Ғузор–Чим–Кўкдала автомобиль йўлини таъмирлаш муддати узайтирилди
Ҳужжат қонун ҳужжатлари маълумотлари миллий базасида эълон қилинган
Ўзбекистон Президентининг 2 ноябрдаги «Ўзбекистон Республикаси Президентининг айрим қарорларига ўзгартиришлар ва қўшимча киритиш тўғрисида»ги қарори қабул қилинди. Бу ҳақда Norma нашри ёзмоқда.
Ҳужжат Президентнинг 2020 йил 9 январдаги қарорига мувофиқ ҳамда республика давлат чегараси орқали автомобиль ўтказиш пунктларида транспорт воситаларининг рухсат этилган вазн ва габарит параметрларига риоя этилиши устидан замонавий ва самарали назоратни ташкил этиш мақсадида қабул қилинган.
Қарор билан Президентнинг қарорларига қуйидаги ўзгартириш ва қўшимчалар киритилди:
биринчидан, 2011 йил 28 декабрдаги Президент қарорига 1-иловада Саудия тараққиёт жамғармаси ва Қувайт араб иқтисодий тараққиёт жамғармаси иштирокида «4Р87 Ғузор–Чим–Кўкдала автомобиль йўлини реконструкция қилиш» лойиҳасининг инвестициявий даврини амалга ошириш муддати 126 ойни ташкил этади.
Иккинчидан, Президентнинг 2017 йил 26 майдаги қарорининг 2-бандида лойиҳанинг инвестициявий даврини амалга ошириш муддати 2022 йил 1 июлга қадар узайтирилди.
Учинчидан, Президентнинг 9.12.2019 йилдаги ПҚ-4545-сон қарори 31-банд билан тўлдирилди, унга мувофиқ:
а) республика Давлат чегараси орқали ўтказиш пунктларида:
- чет давлатлар автотранспорт воситаларининг, шу жумладан республикага кириб келаётган оғир вазнли ва/ёки йирик габаритли транспорт воситаларининг республикага кириши ва унинг ҳудуди орқали транзит ўтиши учун йиғимлар ва тўловлар амалга оширилиши;
- ташувчилар томонидан транспорт воситаларининг рухсат этилган вазн ва габарит параметрларига риоя этилиши устидан назорат божхона органлари томонидан амалга оширилади;
б) 2021 йил 1 декабрдан бошлаб республика ҳудудига чет давлатлар автотранспорт воситаларининг кирганлиги ва унинг ҳудуди орқали транзит ўтиши учун йиғим суммаси қуйидаги тартибда тақсимланади:
- 70 фоизи — Давлат бюджетига;
- 20 фоизи — Транспорт вазирлиги ҳузуридаги Автомобиль йўллари қўмитаси фаолиятини ривожлантириш ва қўллаб-қувватлаш жамғармасига;
- 10 фоизи — Давлат чегараси орқали автомобиль ўтказиш пунктларида замонавий назоратни ташкил этиш ҳамда ушбу божхона постлари ҳудудидаги ички автомобиль йўлларини тегишли ҳолатда сақлаш учун мақсадли йўналтирилган ҳолда божхона органларининг бюджетдан ташқари жамғармасига.
Ҳужжат қонун ҳужжатлари маълумотлари миллий базасида эълон қилинган ва 3 ноябрдан кучга кирди.
Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратгани маълум бўлганди.
