Ҳиндистон молия вазири Нирмала Ситараман 1 апрелдан бошлаб рупийнинг рақамли версиясини ишга туширишини эълон қилди. Бу ҳақда CNBC хабар берди.

Молия вазирининг қайд этишича, рақамли рупийнинг жорий этилиши рақамли иқтисодиётга катта туртки беради. Шунингдек, рақамли рупий банкнотлар каби муомала қилинади.

«Рақамли валютани татбиқ этиш валютани бошқаришнинг янада самарали ва арзонроқ тизимига олиб келади», деган вазир. Ситараман рақамли рупия қандай ишлаши ҳақида тафсилотларни ошкор қилмаган, лекин у «блокчейн ва бошқа технологиялардан фойдаланган ҳолда» амалга оширилишини таъкидлаган.

Қайд этилишича, Ҳиндистон марказий банкдан рақамли валютани жорий қилган дунёдаги энг йирик иқтисодлардан бири бўлади. Шу билан бирга, мамлакат расмийлари биткоин каби криптовалюталарга нисбатан қаттиқроқ позицияни эгаллаган ва ушбу секторни тартибга солиш устида ишламоқда. Молия вазири виртуал рақамли активлардан олинадиган фойда 30 фоиз ставкада солиққа тортилиши керак, деб ҳисоблайди.

Шунингдек, Хитой 2014 йилдан бери юаннинг рақамли версияси устида ишламоқда ва бу соҳада энг кўп ривожланган. Сўнгги икки йил давомида Хитой Халқ банки лотереялар кўринишидаги синовларни ўтказмоқда, унда айрим шаҳарлардаги фуқароларга сарфлаш учун рақамли юань берилади. Хитой ҳали бутун мамлакат бўйлаб ўзининг рақамли валютасини ишга туширмаган ва бунинг учун вақт оралиғини ҳам белгиламаган.

Хитойдан ташқари, Япония ўзининг рақамли валютасини чиқаришни кўриб чиқмоқда. АҚШ Федерал резерв тизими аввалроқ рақамли доллар бўйича тадқиқот эълон қилган, бироқ уни чиқариш/и борасида қатъий позицияни билдирмаган.

Аввалроқ Таиланд сайёҳлар учун рақамли токенлар чиқариши хабар қилинганди.