Илон Маск тавсияси: ўқишга арзийдиган 5 та китоб
Дунёнинг энг бой одами ҳар бир китоб бўйича фикр билдирган.
Tesla асосчиси ва йил одами Илон Маск ўзининг илк 500 долларини 12 ёшида ишлаб топган. Ўшанда у ўзи ишлаб чиққан видео ўйинни сотган. 2020 йилда эса унинг SpaceX компанияси коинотга илк хусусий парвозни амалга оширди. 50 ёшли миллиардер Esquire журналига берган интервьюсида ракета ясашни китоблардан ўрганганини айтди. Қуйида миллиардер Илон Маск тавсия этган китоблар ҳақида сўз боради.
«Нолдан биргача. Келажакни ўзгартирадиган стартапни қандай яратиш керак», Питер Тиль, 2014 йил
Питер Тиль — PayPal тўлов тизимини яратган миллиардер, Facebook’нинг биринчи инвестори. У ҳар қандай муваффақиятли стартапнинг асоси ноёб маҳсулот эканлигига ишонади. Тиль ушбу китобида Facebook, Microsoft, eBay, Twitter мисолида нафақат стартапларни, балки келажакдаги монополияларни қандай яратиш кераклиги ҳақида сўзлар берган.
Бундан ташқари, китобда яхлит меҳнат жамоасини яратиш бўйича кўрсатмалар мавжуд.
«Ушбу муаллиф бир нечта етакчи компанияларни қурган ва ушбу китоб сизга буни қандай қилишни кўрсатади», — дейди Маск.
«Ҳаёт 3.0 Сунъий интеллект даврида инсон бўлиш», Макс Тегмарк, 2017 йил
Макс Тегмарк ўз китобида сунъий интеллектнинг келажаги ҳақидаги машҳур саволларни муҳокама қилади: сунъий интеллект келажак оламга қандай таъсир қилади, сунъий интеллект пайдо бўлгандан кейин инсон туйғулари нима бўлади? Муаллиф ердаги ҳаёт ривожланишининг уч босқичи ҳақида сўзлаб берган. 1.0 — биологик ҳаёт, 2.0 — маданий ҳаёт, билим ва тажриба орттириш, 3.0 — ҳали пайдо бўлмаган нарса, эволюцияни кутмасдан унинг тузилишини тубдан ўзгартириш қобилияти.
«Ерда ва ундан ташқарида ҳаёт ва онг учун буюк келажак сари интилишда қийинчиликлар ва танловлар бўйича жозибали қўлланма», — дейди Илон Маск китоб ҳақида.
«Сунъий интеллект. Босқичлар. Таҳдидлар. Стратегиялар», Ник Бостром, 2014 йил
Илон Маск сунъий интеллектни ядровий қуролдан ҳам хавфлиро деб ҳисоблайди. Шунинг учун миллиардер тез ривожланаётган технология саноати билан қандай курашиш ва оқибатлари қандай бўлишини тушунтирувчи китобни ўқишни тавсия қилади.
«Машина тўхтамоқда», Эдвард Морган Фостер, 1909 йил
Муаллиф ўз китобида узоқ масофали ҳаво қатнови, Интернет ва видеоконференция пайдо бўлишини башорат қилган.
«Ўқишга арзийди», — дейди Илон Маск.
«Атлант елкасини тўғирлади», Айн Рэнд, 1957 йил
Бу истеъдодли ёлғиз ижодкорлар — Атлантларга суяниб қолган дунёни тасвирловчи ижтимоий антиутопия. Китобда ижодкор Атлантлар социалистик ҳукуматга қарши курашда мағлуб бўлгач, дунёни тартибсизлик қамраб олиши тасвирланган.
Аввалроқ Facebook асосчиси Марк Цукерберг тавсия қилган китоблар ҳақида батафсил маълумот берилганди.