SpaceX ва Tesla компанияси асосчиси Илон Маск келишувдан чиққанидан кейин Twitter’ни дастлаб таклиф қилган нархда – 44 миллиард долларга харид қилиш бўйича таклиф жўнатди. Бу ҳақда миллиардер ижтимоий тармоқ раҳбариятига ёзган мактубида маълум қилган, дея хабар бермоқда Bloomberg.

Twitter раҳбарияти апрель ойида Илон Маск тармоқни 44 миллиард долларга сотиб олмоқчилигини маълум қилганди, бироқ май ойи ўрталарида миллиардер компания ҳақиқий фойдаланувчилар орасида бот ва спам-аккаунтларнинг улушини ошкор қилмагунча ҳеч қандай келишув бўлмаслигини билдирди. Маскнинг фикрича, спам-ботлар ҳақиқий аккаунтларнинг 20-25 фоизидан ошиб кетиши мумкин. Маскнинг адвокатларига кўра, бундай маълумотлар бизнес фаолияти учун муҳим ҳисобланади. 8 июль куни Маск Twitter’ни харид қилишдан расман воз кечди ва компанияни бундан хабардор қилди. Натижада бу компания ҳамда миллиардер ўртасида суд жараёнига сабаб бўлган.

Қайд этилишича, Илон Маск яна Twitter’ни ҳар бир акцияси учун 54,20 доллардан, яъни 44 миллиард долларга сотиб олмоқчилигини маълум қилган. Twitter акциялари америкалик тадбиркорнинг янги таклифидан кейин 18 фоизга ошди.

Илон Маск май ойида Twitter’ни сотиб олиш бўйича 44 миллиард долларлик келишувни Россия Президенти Владимир Путиннинг Ғалаба куни муносабати билан кутилаётган нутқи туфайли «секинлаштириш»га қарор қилган бўлиши мумкинлиги ҳақида Business Insider нашри хабар берганди.

Нашрнинг ёзишича, тадбиркор 8 май куни битимда иштирок этган Morgan Stanley банкирига учинчи жаҳон уруши бошланишидан қўрқиб, битимни кейинга қолдиришни сўраб хабар юборган.