2015 йилда Facebook асосчиси Марк Цукерберг ҳар икки ҳафтада битта китоб ўқишга ваъда берган эди. Дастлаб, у обуначиларга мурожаат қилиб, Янги йилга ўзи учун қандай мақсад қўйиши бўйича таклифлар билдиришни сўраган.

Миллиардернинг сўзларига кўра, обуначилари томонидан берилган китоб ўқиш ғояси бошқалари орасида етакчилик қилган. Қуйида Марк Цукерберг тавсиясига кўра, вақт ажратиб ўқишга арзийдиган 5 та китоб ҳақида сўз боради.

«Нима учун баъзи мамлакатлар бой, бошқалари камбағал», Дарон Анжемоглу ва Жеймс Робинсон, 2012 йил

Нима учун Зимбабве, Конго ва Сомали каби давлатлар муваффақиятсизликка юз тутмоқда, бошқа давлатлар эса фаровон ҳаёт кечирмоқда? Бу саволга жавоб бериш учун икки нафар иқтисодчи олим 15 йил давомида сиёсий иқтисодий назарияни ишлаб чиқди ва ушбу китобга жамлади.

«Ушбу китоб мамлакатларни фаровонлик, иқтисодий ривожланиш ва қашшоқликни йўқ қилишга йўналтирадиган турли хил ижтимоий институтлар ва рағбатларни ўрганади», — дейди Марк Цукерберг.

«Геном: турнинг 23 бобдаги автобиографияси», Мэтт Ридли, 1999 йил

Мэтт Ридли генетика ривожланишининг тўлиқ тарихини тақдим этди ва уни инқилоб билан таққослади. Илм-фаннинг жадал ривожланиши ва маълумотларнинг тарқалиши, унинг фикрича, мутантлар ҳақида миш-мишларни келтириб чиқаради, аммо генетик касалликларни даволашнинг янги усулларининг кашфиёти эътиборга олинмайди.

«Ридли инсоният тарихини социология эмас, генетика нуқтаи назаридан айтиб беришга интилади», — дейди миллиардер.

«Рационал оптимист», Мэтт Ридли, 2010 йил

Ридли Цукерберг рўйхатида икки марта тилга олинган ягона муаллифдир. Китоб ҳозирги инқирозлар ва вақтинчалик муваффақиятсизликларга қарамай, инсоният яхши истиқболларга эга деган ғояга бағишланган.

Муаллифнинг ёзишича, онг якдил ва алоҳида интеллектларга бўлинмаган, одамлар биргаликда ҳаракат қилгандагина илдамлайди.

Цукерберг ҳам бу фикрга қўшилиб, «тараққиёт жамиятни олға силжитувчи буюк кучдир», деган фикрни илгари сурган.

«Диний тажрибанинг хилма-хиллиги», Уилям Жеймс, 1902 йил

Ушбу китоб муаллифи XIX ва XX аср бошларининг энг машҳур файласуфларидан биридир. Дин китобда ижтимоий институт сифатида эмас, балки шахснинг ҳис-туйғулари, ҳаракатлари ва тажрибалари йиғиндиси сифатида қаралган.

Цукерберг бу мавзуга «Sapiens» китобини ўқиганидан сўнг қизиқиб қолган. Бу уни дин ва эволюцион жараёнларга оид адабиётларни ўрганишга ундади.

«Биздаги энг яхшиси», Стивен Пинкер, 2011 йил

Стивен Пинкерга кўра, инсоният тарихдаги энг тинч даврда яшамоқда. Муаллиф китобда зўравонлик нима учун йиллар давомида пасайганини тушунтирган. Facebook асосчисининг сўзларига кўра, муаллиф ҳозирги жараёнларни яхши тушунтириб, бу тенденцияни қандай давом эттириш мумкинлиги ҳақида ўз фикрларини таклиф қилган.