Ўзбекистонда 2023 йил якунида иқтисодиётнинг 4,5-5 фоизга ўсиши ва йиллик инфляциянинг 8,5-9,5 фоиз доирасида шаклланиши прогноз қилинмоқда. Бу ҳақда Марказий банк хабар берди.

Макроиқтисодий ривожланишнинг прогнозларига кўра, I чоракда ЯИМ ўсишининг маълум даражада секинлашиши бўйича эҳтимоллик юқори.

Шу билан бирга, айни пайтда базавий инфляциянинг ўсувчи динамикаси ва иқтисодиётдаги таркибий ўзгаришлар даражаси, иккинчи томондан, ташқи иқтисодий шароитлар ва таклиф омилларидаги хатарлар пул-кредит сиёсати таъсир доирасини қисқартириши мумкин.

«Марказий банк пул-кредит шароитларининг талаб, нархлар ва инфляцион кутилмаларга таъсирини синчковлик билан баҳолашда давом этади. Кўрилаётган чора-тадбирлар талаб ва таклиф мутаносиблигини таъминлаш ҳамда инфляциянинг прогноз коридори доирасида шаклланишига ва 5 фоизлик ўрта муддатли таргетига эришишига қаратилади.

Зарур ҳолларда тегишли вазирлик ва идоралар билан биргаликда инфляциянинг номонетар омилларини камайтириш, таъминот занжирларидаги узилишларни бартараф этиш ва зарурий таклиф ҳажмларини таъминлаш бўйича қўшимча чора-тадбирлар ишлаб чиқилади», дейилади хабарда.

Аввалроқ Марказий банк раиси Мамаризо Нурмуратов май ойигача Uzcard ва Humo тўлов тизимларининг банкоматлари интеграция қилиниши мумкинлиги ҳақида маълум қилди. «Биз май ойигача иккала тўлов тизимининг банкоматларини интеграция қилиниши бўйича иш олиб боряпмиз. Кейинги босқичда эса терминаллар ҳам интеграция қилиниши кўзда тутилган», — деди Нурмуратов.