Meta ўз қурилмаларини сотиш учун офлайн дўконлар очиши мумкин
Facebook офлайн дўконлар очишни ребрендингдан анча олдин муҳокама қилган
Илгари Facebook номи билан машҳур бўлган Meta чакана офлайн дўконлар очиш имкониятини муҳокама қилмоқда. Бу ҳақда The New York Times ўз манбаларига таяниб хабар берди.
Уларнинг сўзларига кўра, дўконларда Reality Labs (виртуал ва тўлдирилган реаллик лойиҳалари билан шуғулланувчи) компанияси томонидан ишлаб чиқарилган гаджетларни синовдан ўтказиш мумкин бўлади. Гап Meta Quest деб ўзгартириладиган виртуал реаллик гарнитуралари Oculus Quest ва тез орада Meta Portal деб номланадиган Facebook Portal видеочат қурилмалари ҳақида бормоқда.
Келажакда компания Ray-Ban билан ҳамкорликда ишлаб чиққан ақлли кўзойнаклар Meta дўконларида пайдо бўлади. Ушбу кўзойнаклар ёрдамида фотосурат ва видеолар олиш, телефон қўнғироқларига жавоб бериш, мусиқа ёки подкастларни тинглаш мумкин.
NYT томонидан кўриб чиқилган компания ҳужжатларига кўра, дўконлар харидорларда «қизиқиш ва яқинлик», шунингдек, гаджетлардан фойдаланишда «меҳмондўстлик» каби ҳис-туйғуларни уйғотиши керак.
Нашр манбаларининг таъкидлашича, Facebook офлайн дўконлар очишни ребрендингдан анча олдин муҳокама қилган. Аммо компания бу лойиҳа устида фақат 2020 йилда жиддий ишлай бошлаган. Шунингдек, ушбу ташаббус бекор қилиниши эҳтимоли ҳам йўқ эмас.
Компания ўз дўконлари учун бир нечта номларни кўриб чиққан: Facebook Hub, Facebook Commons, Facebook Innovations, Facebook Reality Store ва From Facebook. Муҳокама охирида Facebook Store варианти танланган.
Флагман дўкони Reality Labs офиси жойлашган Калифорнияда очилиши керак эди. Аммо бу режалар амалга ошиши ҳозирча номаълум. Meta вакили NYT хабари ҳақида изоҳ беришдан бош тортган.
Аввалроқ Facebook ребрендинги қандай резонанс кўтаргани ҳақида таҳлилий мақола эълон қилинганди.