Microsoft Apple’ни ортда қолдириб, дунёдаги энг йирик бозор капиталлашувига эга компанияга айланди. Бу ҳақда CNBC хабар бермоқда.

Тошкент вақти билан соат 19:30 ҳолатига кўра, Microsoft капиталлашуви 2,45 триллион долларни, иккинчи ўриндаги Apple компаниясининг капиталлашуви эса 2,41 триллион долларни ташкил этди.

Nasdaq биржасининг Тошкент вақти билан 19:30 ҳолатидаги маълумотларига кўра, савдолар очилишидан кейин Apple акциялари 3,5 фоиздан кўпроққа тушиб кетган. Бу вақтга келиб компания акциялари тахминан 147 долларга тенг эди. Ушбу кўрсаткич 2021 йил 7 сентябрда эришилган 157,26 долларлик рекорддан тахминан 10 долларга камдир.

Apple нега Microsoft’дан ортда қолмоқда?

Охирги икки ҳафта ичида Apple акциялари асосан ўсишга эришди. Компания сентябрь ойида якунланган чорак натижаларини эълон қилди, бироқ улар таҳлилчиларнинг прогнозларидан паст бўлди. Apple’нинг маълум қилишича, чораклик даромад рекорд даража — 83,4 миллиард долларга етган, бу 2020 йилнинг шу даврига нисбатан 29 фоизга кўп. Аммо экспертлар даромадни 84,85 миллиард долларга етишини кутган эди.

Компания бош директори Тим Кукнинг айтишича, Apple етказиб беришдаги муаммолар туфайли 6 миллиард доллар йўқотган. У компанияни жорий чоракда таъминот занжирида янада катта муаммолар кутаётгани ҳақида огоҳлантирди. Apple’нинг асосий маҳсулоти — савдодан тушган маблағ қарийб 38,87 миллиард долларни ташкил этган iPhone сотуви ҳам кутилганидан паст бўлди.

Microsoft акциялари, аксинча, 29 октябрь кунги савдолар давомида деярли 1 фоизга қимматлашиб, ҳар бир акция нархи 327 долларни ташкил қилди. Компания даромади ўтган чоракда, Apple’дан фарқли ўлароқ, таҳлилчиларнинг кутган прогнозларидан ошиб кетди: Microsoft даромади 2020 йилга нисбатан 22 фоизга ўсиб, 45,32 миллиард долларни ташкил этди.