Microsoft’нинг 100 дан ортиқ дастурчиси Мета’га ўтиб кетди
Баъзи ходимларга икки баробар кўп ойлик таклиф қилинган.
2021 йилда АҚШнинг энг йирик компаниялари ўртасида «метаверсе» яратиш бўйича кадрлар учун кураш чоғида Microsoft’нинг юзга яқин VR (виртуал реаллик) дастурчилари компанияни тарк этди. Бу ҳақда The Wall Street Journal хабар берди.
Нашрнинг LinkedIn маълумотларига таяниб ёзишича, ўтган йил давомида Microsoft’га қарашли HoloLens жамоасининг 40 га яқин собиқ ходимлари MetaPlatforms’га ўтган. Тармоқ маълумотлари Microsoft’ни 70 нафар ходим тарк этганини кўрсатишига қарамай, нашр манбалари компанияни 100 дан ортиқ дастурчи тарк этганини келтирмоқда.
Microsoft’нинг собиқ ходими сўзларига кўра, рақобатчилар виртуал реаллик ишлаб чиқиш тажрибасига эга бўлган дастурчиларни ўзига чорламоқда ва баъзида уларнинг иш ҳақини икки баравар оширишни таклиф қилмоқда.
Microsoft вакилининг айтишича, ходимларнинг кетиб қолиши кўплаб жамоаларда учрайдиган ва кенг тарқалган муаммодир. Компания эса ходимларни сақлаб қолиш ва керак бўлганда янгиларини ишга олиш учун қўлидан келган барча ишни қилмоқда.
Meta эса ўзининг ходим ёллаш амалиёти ҳақида изоҳ беришдан бош тортган.
Аввалроқ Apple иқтидорли ходимларига Meta’га ўтиб кетмаслик учун бонуслар бергани хабар қилинганди.
