Moderna ОИВга қарши вакцинани одамларда синовдан ўтказишни бошлади
Клиник синовларнинг биринчи босқичида 56 киши қатнашди.
Американинг Moderna биотехнология компанияси ОИТСга қарши вакцина бўйича халқаро ташаббус билан биргаликда кўнгиллиларга препаратнинг биринчи дозасини юборди. Бу ҳақда компания сайтида хабар берилган.
Қайд этилишича, клиник синовларнинг биринчи босқичида ОИВ юқтирмаган 56 нафар ўрта ёшли киши иштирок этади. Улардан 48 нафари янги вакцина олади, саккиз нафар кўнгилли эса кучайтирувчи укол олади. Шунингдек, вакцина олган 32 нафар иштирокчи кучайтирувчи укол ҳам олади.
Препаратни тайёрлашда Covid-19’га қарши вакцинани ишлаб чиқиш усулидан фойдаланилган. Олимларнинг таъкидлашича, препаратни инъекция қилиш ОИВнинг кўплаб вариантларига қарши кураша оладиган антителани ишлаб чиқаради.
«ОИВ вакцинасини излаш узоқ ва қийин бўлди. Касалликнинг олдини олиш учун янги воситаларга эга бўлиш ОИВга қарши зудлик билан зарур бўлган самарали вакцина ишлаб чиқиш сари тез ривожланишнинг калити бўлиши мумкин», — дейди Халқаро ОИТСга қарши эмлаш ташаббуси директори Марк Файнбер.
АҚШ ҳукумати статистик маълумотларига кўра, тахминан 1,2 миллион америкалик ОИВ билан касалланган. 1990-йиллардан бери шифокорлар янги даволаш усуллари ва дори воситалари билан касалликка қарши курашмоқда. Аммо ОИВга қарши вакциналар ҳали эрта клиник синовлардан муваффақиятли ўтмаган.