Ўзбекистонда айрим озиқ-овқат маҳсулотлари ҚҚСдан озод қилинади
Солиқ имтиёзи 31 декабргача амал қилади
Ўзбекистонда гўшт, картошка ва музлатилган балиқ маҳсулотлари қўшилган қиймат солиғидан озод қилинади. Бу ҳақдаги қонун Олий Мажлис Сенати ялпи мажлисида маъқулланди.
Маълум қилинишича, ялпи мажлисда «Ўзбекистон Республикасининг Солиқ кодексига аҳолини асосий турдаги озиқ-овқат маҳсулотлари билан кафолатли таъминлашга қаратилган қўшимча киритиш тўғрисида»ги қонун кўриб чиқилди.
Қонун билан республикада гўшт маҳсулотлари ва асосий истеъмол маҳсулоти бўлмиш картошкага бўлган талаб ва нархлар барқарорлигини таъминлаш орқали аҳоли даромадларини ошириш мақсадида Солиқ кодексига қўшимча киритилмоқда.
Хусусан, Солиқ кодексининг 483-моддасига 10 октябрдан 31 декабрга қадар бўлган даврда гўшт (мол, қўй, товуқ), тирик ҳайвонлар (қорамол ва парранда) ва уларни сўйиш маҳсулотлари, картошка ҳамда музлатилган балиқни Ўзбекистон Республикаси ҳудудига олиб кириш, шунингдек уларни реализация қилиш бўйича айланмалар қўшилган қиймат солиғидан озод қилиш бўйича қўшимча норма киритилмоқда.
Қайд этилишича, қонуннинг қабул қилиниши аҳолини асосий турдаги озиқ-овқат маҳсулотлари билан кафолатли таъминлаш, нархларни барқарорлаштириш ва аҳоли даромадларини оширишга хизмат қилади. Қонун сенаторлар томонидан маъқулланди.
Аввалроқ Ўзбекистонда айрим турдаги мевалар божхона божидан озод этилиши ва сунъий мўйна ва шиша ипларга импорт божи нолга тенглаштирилиши ҳақида хабар берилганди.