«Ўзбекистон республика товар-хом ашё биржаси» очиқ савдоларида 10–16 январь кунлари жами 1 триллион 947,6 миллиард сўмлик товар ресурслари сотилди. Бу ҳақда биржа матбуот хизмати хабар берди.

Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйган. Ўтган ҳафтада биржа савдоларида 27 минг 154,0 тонна қора металл қўйилган ва улардан 17 минг 352,0 тоннаси, яъни 63,9 фоиз қисми сотилган. Ўтказилган савдоларда ҳар куни ўртача 163 харидор иштирок этиб, ўртача кунлик сотув ҳажмлари 3470,4 тоннани ташкил қилган.

Кўриб чиқилаётган даврда барча маркадаги қора металлнинг кунлик ўртача нархлари маҳсулотнинг бир тоннаси учун 9 миллион 287,2 минг сўмдан 9 миллион 261,3 минг сўмгача пасайган.

Шунингдек, биржанинг кўмир бозорида ҳам нархлар пасайиши қайд этилган. Ҳафта давомида биржа савдолари орқали 4544,0 тонна кўмир сотилган. Ўтказилган савдоларда ҳар куни ўртача 8 харидор иштирок этган.

Кўриб чиқилаётган даврда кўмир бўйича шаклланган кунлик ўртача нархлар маҳсулотнинг бир тоннаси учун 261,2 минг сўмдан 250,2 минг сўмгача, яъни 4,2 фоизга пасайган.

Ўтган ҳафта мобайнида биржа савдоларига 19 минг 137,0 тонна техник чигит қўйилган ва улардан 18 минг 75,0 тоннаси, яъни 94,5 фоиз қисми сотилган. Маҳсулотнинг ўртача кунлик сотув ҳажмлари 3,6 минг тоннани ташкил қилган.

Кўриб чиқилаётган даврда техник чигит бўйича шаклланган кунлик ўртача нархлар маҳсулотнинг бир тоннаси учун 4 миллион 70,2 минг сўмдан 3 миллион 975,6 минг сўмгача, яъни 2,3 фоизга пасайган. Ўтказилган савдоларда ҳар куни ўртача 31 харидор иштирок этган.

Аввалроқ Ўзбекистон аҳолисига январь-февраль ойларида қўшимча кўмир етказиб берилиши хабар қилинганди. Шунингдек, Ўзбекистонда 11 ойда қанча кўмир ишлаб чиқарилгани очиқланди.