Ўзбекистон ва Қозоғистон қарийб 6 млрд долларлик шартнома ва битим имзолади
Ўзбекистон ва Қозоғистон ўртасида товар айланмасини ошириш бўйича қўшма «Йўл харитаси» тайёрланган
Кеча, 4 декабрь куни Нур-Cултон шаҳрида Ўзбекистон-Қозоғистон бизнес-форуми ва Ўзбекистон-Қозоғистон ишбилармонлар Кенгашининг кенгайтирилган йиғилиши якунида 5,9 миллиард долларлик савдо шартномалари ва икки томонлама битимлар имзолади. Бу ҳақда Инвестициялар ва ташқи савдо вазирлиги матбуот хизмати хабар берди.
Қайд этилишича, Ўзбекистон-Қозоғистон Ишбилармонлар кенгашининг 4-йиғилишида икки мамлакатнинг асосий вазирликлари, идоралари, тармоқ бирлашмалари, савдо-саноат палаталари, холдинг компаниялари раҳбарлари ва ишбилармон доиралари вакиллари иштирок этган.
Икки мамлакат ҳукуматларининг Ўзбекистон ва Қозоғистон ишбилармонлари ўртасида қўшма инвестициявий лойиҳаларни амалга ошириш ва икки томонлама савдони фаоллаштириш борасида бевосита ҳамкорлик ўрнатиш учун қулай шарт-шароитлар яратиш бўйича ҳамкорлик қилишга тайёрлиги қайд этилган.
«Бу борада, аллақачон, иш олиб борилмоқда. Жумладан, мавжуд тариф ва нотариф тўсиқларни бартараф этиш бўйича аниқ чора-тадбирларни, қишлоқ хўжалиги ва озиқ-овқат маҳсулотларини мунтазам етказиб беришни таъминлаш мақсадида қўшма улгуржи савдо марказларини ташкил қилишни ҳамда бошқа ташаббусларни ўз ичига олган ўзаро товар айланмасини ошириш бўйича қўшма ‘Йўл харитаси’ тасдиқлаш учун тайёрланди», дейилади хабарда.
Шунингдек, икки мамлакат ишлаб чиқарувчилари ўртасида саноат ҳамкорлигини йўлга қўйиш ва шу орқали Ўзбекистон ва Қозоғистон иқтисодиётларининг қиёсий устуворликларини ҳисобга олган ҳолда узлуксиз қўшилган қиймат занжирларини шакллантиришнинг кенг истиқболлари қайд этилган.
Хабарга кўра, тадбирда икки мамлакатнинг чегара ҳудудида Халқаро саноат кооперацияси маркази ташкил қилиниши алоҳида қайд этилган. Марказ зарур ишлаб чиқариш инфратузилмаси билан жиҳозланади. Унинг резидентлари ўзбекистонлик ва қозоғистонлик тадбиркорларини қўшма саноат корхоналарини ташкил этишга жалб қиладиган бир қатор имтиёз ва преференцияларга эга бўлади.
Форум якунида умумий қиймати 5,9 миллиард долларга тенг бўлган қўшма лойиҳа ва ташаббусларни амалга ошириш бўйича савдо шартномалари ва икки томонлама битимлар имзоланган.
Аввалроқ Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов Қозоғистон бош вазири Асқар Мамин билан учрашгани ҳамда томонлар Ўзбекистон Президентининг Қозоғистонга ташрифига тайёргарлик кўриш масалаларини муҳокама қилгани хабар қилинганди.