Ўзбекистонда 1 апрелдан давлат муассасалари маълумотлари очиқ порталда эълон қилинади. Бу ҳақда Адлия вазирлигининг Huquqiy axborot канали хабар берди.

Маълум қилинишича, «Давлат муассасаларини ислоҳ қилишни жадаллаштириш чора-тадбирлари тўғрисида»ги Президент қарори қабул қилинган. Қарорга кўра:

• бир товар бозорида 5 та ва ундан ортиқ хусусий тадбиркорлик субъектлари фаолият юритиб келаётган, рақобат ривожланган соҳаларда фаолият юритаётган давлат муассасалари тугатилади ёки хўжалик жамиятларига ўзгартирилган ҳолда хусусий секторга сотилади;
• давлат муассасалари мажбурий тартибда Ягона ғазна ҳисобварағида шахсий ғазна ҳисобварақларига эга бўлади.

Шунингдек, 2022 йил 1 апрелдан очиқ маълумотлар порталида фойдаланувчилар учун қулай форматларда кўриш имкониятини яратган ҳолда муассасаларнинг юқори турувчи ташкилоти, кўчмас мулк объектлари, қурилиши тугалланмаган объектлар ва автотранспорт воситалари, режалаштирилган ва амалга оширилган харажатлар таркиби ҳақидаги ва бошқа маълумотларни (бундан тижорат сири мавжуд ёки чекланган ҳолда тарқатиладиган маълумотлар мустасно) эълон қилиш амалиёти жорий этилади.

Бундан ташқари, давлат муассасаларини ташкил этиш тўғрисидаги қарорда ҳамда муассаса устави (низоми)да унинг ташкилий-ҳуқуқий шакли «давлат муассасаси» экани кўрсатилади. Шунингдек, хўжалик жамиятлари устав фонди (устав капитали)даги давлат органлари, маҳаллий давлат ҳокимияти органлари, давлат унитар корхоналари, давлат муассасалари, Марказий банк ҳамда Тикланиш ва тараққиёт жамғармасига тегишли акциялар ва улушлар давлат улушлари ҳисобланади.

Шу билан бирга, давлат иштирокидаги хўжалик жамиятларига тегишли бўлган хўжалик жамиятларининг устав фонди (устав капитали)даги улушлар ва акциялар давлат улуши ҳисобланмайди.

Қарорга кўра, маҳсулотларни (ишларни, хизматларни) реализация қилишдан олган тушуми БҲМнинг 100 минг бараваридан ортиқ бўлган давлат муассасалари 2022 йил 1 мартдан 2023 йил 1 августгача эксперимент тариқасида ташқи, шу жумладан мол-мулкнинг мавжудлиги, мажбуриятлар бажарилишининг амалдаги ҳолати ва оқибатларини ўрганиш масалалари юзасидан аудиторлик текширувидан ўтказилади.

Президент ва Ҳукумат қарорларида назарда тутилган ҳоллардан ташқари давлат муассасаларига хўжалик жамиятларини таъсис қилиш ҳамда уларнинг устав фонди (устав капитали)да иштирок этиш тақиқланади.

Аввалроқ Ўзбекистонда давлат корхоналарига қўшимча имтиёз бермаслик белгиланиши мумкинлиги хабар қилинганди. Шунингдек, Шавкат Мирзиёев давлат мулкини хусусийлаштириш бўйича йиғилиш ўтказгани ҳақида хабар берилди.