Ўзбекистонда аёллар раҳбарлик қилаётган корхоналар бир йилда 2,3 трлн сўм соф фойда кўрди
Ўзбекистонда 2021 йил давомида аёл раҳбарлар бошқарувидаги 16 минг 359 та кичик корхона ва микрофирмалар 2,3 трлн сўм соф фойда олди. Худди шу даврда эркаклар бошқарувидаги 121 минг 746 та кичик корхона ва микрофирмалар 27,9 трлн сўм соф фойда кўрган.
Ўзбекистонда аёл раҳбарлар бошқарувидаги корхоналар 2021 йил давомида 2,3 триллион сўм соф фойда олди. Бу ҳақда Давлат статистика қўмитаси матбуот хизмати хабар берди.
Қўмитас маълумотларига кўра, 2022 йилнинг 1 январь ҳолатига Ўзбекистонда аёл раҳбарлар бошқарувидаги 16 минг 359 та кичик корхона ва микрофирмалар 2021 йилда 2,3 триллион сўм соф фойда олган. Худди шу даврда эркаклар бошқарувидаги 121 минг 746 та кичик корхона ва микрофирмалар 27,9 триллион сўм соф фойда кўрган.
Қайд этилишича, ўрта ҳисобда битта тадбиркорлик субъектига тўғри келадиган соф фойда миқдори тадбиркор эркак раҳбарлигидаги кичик тадбиркорлик субъектларида 229,7 миллион сўмни ташкил этган бўлса, тадбиркор аёл раҳбарлигидаги корхоналарда бу кўрсаткич ўртача 141,4 миллион сўмга етган.
2022 йилнинг 1 январь ҳолатига Ўзбекистонда тадбиркор аёл раҳбарларнинг иқтисодий соҳалар бўйича фаолияти қуйидагича:
- савдо соҳасида – 14 минг 147 та
- хизматлар соҳасида – 10 минг 057 та
- саноатда – 5 минг 543 та
Аввалроқ аёлларнинг бошқаруви компанияларга хилма-хиллик олиб келиши бўйича тадқиқот натижалари эълон қилинганди. Унга кўра, юқори раҳбарликда аёлларнинг ишлаши (C-suite) аёл бош директорлар сонини оширишнинг калитига айланмоқда. Бош директорлар кўпинча юқори бошқарувдан олинади ва бу лавозимларда аёлларнинг мавжудлиги компаниянинг уларни қўллаб-қувватлаши ва ўқитиш қобилиятини акс эттиради.