Ўзбекистонда боғдорчилик-узумчилик ширкатлари биноларини турар-жой тоифасига ўтказишга рухсат берилди
Давлат рўйхатидан ўтган ширкатлар маълумотлари алмашинуви «Электрон ҳукумат» тизимида амалга оширилади.
Ўзбекистонда боғдорчилик-узумчилик ширкатлари биноларини турар-жой тоифасига ўтказиш тартиби белгиланди. Бу ҳақда Norma хабар берди.
Маълум қилинишича, Вазирлар Маҳкамасининг 3 декабрдаги «Боғдорчилик-узумчилик ширкатлари фаолиятини тартибга солишнинг қўшимча чора-тадбирлари тўғрисида»ги қарори қабул қилинган.
Ҳужжат боғдорчилик-узумчилик ширкатлари фаолиятини тартибга солиш, шунингдек, жамоа боғдорчилиги ва узумчилиги юритиш учун ажратилган ер участкасида жойлашган бино ва иншоотларга бўлган ҳуқуқларни давлат рўйхатидан ўтказиш ишларини ташкил этишга қаратилган.
Қайд этилишича, боғдорчилик-узумчилик ширкатлари ҳудудида биноларни турар жой тоифасига ўтказиш объектни қайта ихтисослаштириш ва реконструкция қилишга рухсатнома бериш бўйича давлат хизматлари кўрсатишнинг маъмурий регламентига мувофиқ амалга оширилади.
Бундан ташқари, кўчмас мулк объектларига бўлган ҳуқуқларни давлат рўйхатидан ўтказиш тартиби тўғрисидаги низомга мувофиқ боғдорчилик-узумчилик ширкатлари ҳудудидаги бинолар давлат рўйхатидан ўтказилган вақтдан бошлаб мулк ҳуқуқи билан турар жой сифатида эътироф этилади.
Шунингдек, давлат рўйхатидан ўтган ширкатлар тўғрисида Давлат хизматлари агентлиги ва Кадастр агентлиги ўртасида электрон ҳамкорлик орқали маълумотлар алмашинуви «Электрон ҳукумат» тизимининг идоралараро интеграциялашув платформаси орқали амалга оширилади.
Ҳужжат қонун ҳужжатлари маълумотлари миллий базасида эълон қилинган ва 4 декабрдан кучга кирган.
Аввалроқ Президент қишлоқ хўжалигига мўлжалланмаган ер майдонларини хусусийлаштиришга оид қонун имзолагани хабар қилинганди. Шунингдек, Ўзбекистонда деҳқончилик учун 1 гектаргача ер ижарага берилиши ҳақида хабар берилди.