Ўзбекистонда божхона органлари пулли хизмат кўрсатишни бошлайди. Бу ҳақда Norma хабар берди.

Маълум қилинишича, Президентнинг 18 февралдаги «‘Давлат божхона хизмати тўғрисида’ги Ўзбекистон Республикаси Қонунига ўзгартиш ва қўшимчалар киритиш ҳақида»ги қонуни имзоланган.

Ўзгартириш ва қўшимчалар бир қатор бандлардан иборат. Биринчидан, 3-модданинг 7-бандига мувофиқ божхона органларининг асосий вазифалари доираси кенгайтирилган. Божхона органларига ўз ваколатлари доирасида жиноятлардан олинган даромадларни легаллаштиришга, терроризмни молиялаштиришга ва оммавий қирғин қуролларини тарқатишни молиялаштиришга қарши курашиш бўйича чора-тадбирларни ишлаб чиқиш ва амалга оширишда иштирок этиш вазифаси берилган.

Иккинчидан, 7-модда 4 ва 13-бандлар билан тўлдирилган. Уларга мувофиқ, божхона органлари қонун ҳужжатларида белгиланган тартибда божхона аудитини ўтказиш, шунингдек жисмоний ва юридик шахсларга пуллик хизматлар кўрсатиш ҳуқуқига эга.

Учинчидан, 13-модданинг 4-қисми янги таҳрирда баён этилган, унда алоҳида ҳолларда божхона органлари хизматга қуйидагилар қабул қилиниши белгиланган:

• фармон, қарор ёки фармойиш, Президентнинг розилиги ёки Вазирлар Маҳкамасининг қарори ёхуд Давлат божхона қўмитаси раисининг буйруғи асосида бошқа давлат органлари ва ташкилотлари ходимлари;
• Давлат божхона қўмитаси раисининг буйруғи асосида тор ихтисослашган юқори малакали мутахассислар бўлган 30 ёшдан ошган фуқаролар.

Тўртинчидан, 13-модданинг 5-қисми ҳам ўзгартирилган. Ўзгартишларга мувофиқ, божхона органларига хизматга қабул қилиниши мумкин бўлмаган шахслар қаторига жиноий жавобгарликдан озод қилинган фуқаролар қўшилган.

Бешинчидан, 17-модданинг 1-қисми янги таҳрирда баён этилган. Унда Давлат божхона қўмитасининг раиси Олий Мажлис Қонунчилик палатаси томонидан тасдиқланганидан кейин бош вазирнинг тақдимига биноан Президент томонидан тасдиқланади ва лавозимидан озод этилади.

Олтинчидан, 18-модда 2-қисм билан тўлдирилган. Унга кўра божхона органларига қабул қилинган ходимлар (Божхона институти битирувчилари бундан мустасно) бирламчи касбий қайта тайёрлашдан ўтиши шарт.

Таъкидланишича, бошқа ўзгартириш ва қўшимчалар киритилган. Ҳужжат қонун ҳужжатлари маълумотлари миллий базасида эълон қилинган ва 2022 йил 18 февралдан кучга кирган.

Аввалроқ Ўзбекистонда Божхона кодексига қўшимча ва ўзгартиришлар киритилгани хабар қилинганди. Шунингдек, Президент 2022 йил божхона тизимида бўладиган ўзгаришларни санагани ҳақида хабар берилди.