Ўзбекистонда январь ойида сўнгги уч йилдаги энг паст инфляция кўрсаткичи қайд этилди — 0,8 фоиз
Ўзбекистонда 2023 йининг январь ойида инфляция 0,82 фоизни ташкил этди. Бу охирги уч йилдаги энг паст кўрсаткич ҳисобланади. Озиқ-овқат маҳсулотлари ой давомида ўртача 1 фоизга қимматлашган. Ноозиқ-овқат маҳсулотлари 0,6 фоизга, аҳолига пуллик хизматлар 0,7 фоизга ошди
Ўзбекистон истеъмол бозорида 2023 йил январь ойида товар ва хизматлар ўртача 0,82 фоизга қимматлашди. Бу ҳақда Статистика агентлиги ҳисоботида маълум қилинди.
Бу сўнгги уч йилдаги январь ойидаги энг паст кўрсаткичдир. Хусусан, 2022 йил январь ойида инфляция 0,87 фоизни, 2021 йилда 1 фоизни, 2020 йилнинг биринчи ойида эса инфляция 0,59 фоизни ташкил этди.
Шунингдек, бир йил мобайнида инфляция 12,19 фоизни ташкил этди, бу 2022 йил январь ойига нисбатан сезиларли даражада юқори — 9,8 фоиз.
Ҳисоботга кўра, озиқ-овқат маҳсулотлари ой давомида ўртача 1 фоизга қимматлашган. Ноозиқ-овқат маҳсулотлари 0,6 фоизга, аҳолига пуллик хизматлар 0,7 фоизга ошди. Йиллик ҳисобда озиқ-овқат маҳсулотлари 15,4 фоизга, ноозиқ-овқат маҳсулотлари 10,9 фоизга, хизматлар 8,1 фоизга қимматлашди.
Шу билан бирга, сут нархининг ойлик ўсиши эса декабрга нисбатан кескин секинлашган. Январь ойида у 0,1 фоизга қимматлашди, декабрда — 2,4 фоизга. Тухум нархининг ўсиши ҳам декабрь ойида 5,2 фоизга нисбатан январь ойида 2 фоизга секинлашди.
Кунгабоқар ёғи ва шакар нархи кетма-кет тўртинчи ой, пахта ёғи нархи сўнгги уч ойда пасаймоқда. Январь ойида шакар 1,4 фоизга, кунгабоқар ёғи 0,7 фоизга, пахта ёғи 0,5 фоизга арзонлашди.
Охирги 12 ойда тухум 32 фоизга, пахта ёғи 6,8 фоизга, кунгабоқар ёғи 7,8 фоизга, шакар 40,2 фоизга, сут 16,6 фоизга, буғдой уни 43 фоизга қимматлашган, гуруч — 25,5 фоизга.
Сабзавот ва мевалар орасида энг кўп пиёз — январь ойида 44,7 фоизга (12 ой давомида 2,8 марта) қимматлашди. Бу кескин совуқ ва пиёз захираларининг бир қисмини йўқотиш билан боғлиқ. Ой давомида помидор 7,4 фоизга, булғор қалампири 7,2 фоизга, бақлажон 7,2 фоизга, бодринг 7 фоизга қимматлашди.
Кийим ва пойафзал нархи бир ой давомида 0,9 фоизга, йил давомида мос равишда 9,4 фоизга ва 9,6 фоизга ошди. Маиший техника 0,5 фоизга (9,9 фоиз) ўсди.
Аввалроқ 2022 йил давомида миллий валютанинг АҚШ долларига нисбатан тебраниши 10 801–11 572 доллар/сўм диапазонида шаклланиб, 3,9 фоизга қадрсизлангани ҳақида хабар берилганди.
