Қандай қилиб янги ходим компания муаммоларини ҳал қилиши мумкин? Экспертдан 3 та маслаҳат
Профессор Арт Маркман янги ишчининг фойдали томони ҳақида фикрлари билан бўлишди.
Муаммога дуч келганингизда нима қиласиз? Эҳтимол, вазиятга бошқа кўз билан, бошқа томондан қараши мумкин, деб дўстингиз ёки қариндошингиздан маслаҳат оласиз.
Ишда ҳам худди шундай: лойиҳа ёки жамоа натижа бермай, муаммога ечим топилмаётган пайтда янги ходимларга юзланиш тўғри бўлади. Чунки улар кўпинча муаммога ташқи томондан ёки бошқа кўз билан қарай олади, ноодатий таклиф ёки тўғри ечим бера олади.
Техас университетининг психология ва маркетинг профессори Арт Маркман юқоридаги қарашнинг учта сабабини тушунтирган. Қуйида шу ҳақда сўз боради.
1. Янги ходимларнинг позицияси асосий жамоаникидан фарқ қилади
Янги ходимлар билан ишлашда асосий қийинчилик шундаки, улар ҳали компаниянинг корпоратив маданиятини қабул қилмаган бўлади. Бироқ янги келганларнинг айнан шу жиҳати муаммоларни ҳал қилиш нуқтаи назаридан қўл келиши мумкин.
Янги ходимлар одатда муайян вазифаларни қандай бажаришингизни билмайди. Бу оддий иш кунида жараённи секинлаштириши мумкин, аммо муаммога дуч келганингизда ёрдам бериши ҳам мумкин, чунки янги келган ходим жуда кўп савол беради.
Янги келганларга иш тамойилларини тушунтиришда аввалдан мавжуд бўлган, бироқ эътибордан четда қолган муаммолар кўрина бошлайди. Бу эса қайси жараёнлар эскирганини ва қайси соҳалар бўйича жамоада билим етишмаслигини кўришга ёрдам беради.
2. Янги келганлар бошқа билимларга эга бўлади
Янги ходимлар компанияга ўзлари билан янги кўникмаларни олиб келади. Бу янги ишчининг аввалги соҳаси ёки эски иш жойида тўплаган тажрибаси билан боғлиқ бўлиши ва у сизга ас қотиши мумкин. Албатта, янги келган ходим маълум бир шаблон ёки «рамка» доирасида эмас, балки бутун борлиғи билан жамоага ёрдам бериши учун етарли даражада стимул, яъни рағбат яратилиши керак.
Янги келганлардан янги ғоялар ўзаро суҳбат доирасида пайдо бўлиши мумкин. Суҳбат масаланинг нозиклигига қараб жамоа доирасида ёки ўзаро тушликларда ташкил этилади.
3. Улар бошқа тилда гаплашади
Ҳар бир компанияда бошқа жамоалар ва процедуралар учун номлар, мижозларнинг тахаллуслари ва бошқалар мавжуд. Ушбу сўзларга корпоратив маданиятнинг бир қисмига айланган кўплаб нотўғри фикрлар ўрнашиб қолган бўлади.
Янги ишга қабул қилинганлар ҳали профессионал жаргонда гапира олмагани сабабли, жамоа аъзолари таниш ташкилий тилдан фойдаланганда одатда ўйлаганидан фарқ қиладиган атамалардан фойдаланади. Яъни, янги ходимлар ҳамкасблари билан мулоқот қилиш жараёнида ҳаммани мавзу ҳақида бироз бошқача гапиришга мажбурлаши мумкин ва бу, ўз навбатида, бошқача фикр юритишга мажбур қилади.
