Йил бошидан буён Ўзбекистон автомобиль бозорида барқарор фаоллик сақланмоқда, мавсумий савдонинг пасайишига қарамай, июнь ойида бирламчи бозорда савдоларнинг ўртача тикланиши қайд этилди. Бу ҳақда Иқтисодий тадқиқотлар ва ислоҳотлар маркази таҳлилида келтирилган.

Жорий йил май ойига нисбатан июнь ойида енгил автомобиллар савдоси ҳажми 3%кўпроққа ошган бўлиб, бу 80 мингта автомобиль бирлигига тўғри келади.

Ёз бошида кузатилган муайян даражадаги тикланишга қарамай, жорий йилнинг биринчи олти ойи давомида енгил автомобиллар савдосининг жами ҳажми тахминан 446 минг донадан иборат бўлди, бу эса 2024 йилнинг шу даврига нисбатан 23%га камдир.

Бундай пасайиш, асосан, савдоларнинг катта қисми тўғри келадиган иккиламчи бозордаги фаолликнинг сусайиши билан изоҳланади ва айнан шу омил умумий бозор фаолияти пасайишининг асосий сабаби бўлди.

Бирламчи автомобиль бозори

Бирламчи енгил автомобиллар бозорида савдолар ўтган ойга нисбатан 10%дан зиёдга ошиб, 2,6 мингта автомобилга кўпайди.

Маҳаллий ишлаб чиқарилган янги енгил автомобиллар савдоси эса 23,7 минг донага етди ва бу кўрсаткич ўтган ойга нисбатан 15,6%га ўсганини кўрсатади.

Янги хорижий енгил автомобиллари сегментида салбий динамика кузатилди — ойлик савдо ҳажми тахминан 4 минг донани ташкил этиб, ўтган ойга нисбатан 12,6%га камайган.

Иккиламчи автомобиль бозори

Июнь ойида 52 минг донадан ортиқ фойдаланилган енгил автомобиллар сотилди, бу май ойига нисбатан атиги 0,4%га кам, иккиламчи бозорда йиллик ўсиш 1,3%ни ташкил этди.

Электромобиль бозори

Июнь ойида енгил электромобиллар савдоси 5,1 минг донага етди, бу май ойига нисбатан 1,7%га кам. Ойлик бироз камайишга қарамай, йиллик кўрсаткичларда бозор барқарор динамикани намоён этмоқда.

Биринчи ярим йиллик якунларига кўра, сотилган электромобиллар ҳажми 28,8 минг донага етди, бу эса ўтган йилнинг мос даврига нисбатан 62,6%га кўпдир.

Электромобиллар савдосининг энг катта ўсиши Сирдарё, Хоразм ва Қашқадарё вилоятларида қайд этилди.