Қишлоқ хўжалиги вазирлиги ЕИ ва БМТ билан 4 млн евролик лойиҳа амалга оширади
Лойиҳани амалга ошириш муддати 2025 йил 30 сентябргача этиб белгиланган
Ўзбекистон Қишлоқ хўжалиги вазирлиги Европа Иттифоқининг Ўзбекистондаги делегацияси ва БМТ Тараққиёт дастурининг Ўзбекистондаги ваколатхонаси билан 4 миллион 150 минг долларлик лойиҳа амалга оширади. Бу ҳақда вазирлик ахборот хизмати хабар берди.
Маълум қилинишича, қишлоқ хўжалиги вазирлиги, Европа Иттифоқининг Ўзбекистондаги делегацияси ва БМТ Тараққиёт дастурининг Ўзбекистондаги ваколатхонаси ўртасида «Агро-озиқ-овқат секторида яшил иқтисодиётга инклюзив ўтишни қўллаб-қувватлаш ва қишлоқ хўжалигида билимлар ва инновацияларнинг иқлимга мослашган тизимини ривожлантириш» лойиҳасини амалга ошириш бўйича ҳужжат имзоланди.
Лойиҳа буджети 4 миллион 150 минг еврони ташкил этади. Уни амалга ошириш муддати эса 2025 йил 30 сентябргача этиб белгиланган.
Лойиҳани имзолаш маросими қишлоқ хўжалиги вазири Жамшид Хўжааев, Европа Иттифоқининг Ўзбекистондаги элчиси Шарлотта Адриан ва БМТ Тараққиёт дастурининг Ўзбекистондаги доимий вакили Матилда Димовска иштирокида бўлиб ўтди.
Янги лойиҳа озиқ-овқат ва қишлоқ хўжалиги секторида яшил иқтисодиётга инклюзив ўтиш ва қишлоқ хўжалигида билимлар ва инновацияларнинг «иқлимга оптимал мослашган» тизими (УАКИС)ни жорий этишга ҳисса қўшишга қаратилган.
Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратиши ҳақида хабар берилганди.
