«Қўйлиқ» бозорининг тақдири. Иқтисодчи бир қатор саволларни ўртага ташлади
Иқтисодчи Отабек Бакиров «Қўйлиқ» бозорининг кўчирилишига муносабат билдирди.
Тошкент шаҳрида жойлашган «Қўйлиқ» деҳқон бозори ва унга туташ улгуржи савдо майдони бошқа манзилга кўчирилади. Деҳқон бозори ва улгуржи савдо майдони жойлашган манзилда йўл кенгайиши ва кўприк қурилиши ишлари режалаштирилган.
Тошкент шаҳар ҳокимлиги «Қўйлиқ» деҳқон бозорининг кўчирилишини жамоатчиликка маълум қилгач, иқтисодчи Отабек Бакиров бунга муносабат билдириб, бир қатор саволларни ўртага ташлади.
Биринчидан, иқтисодчи «Қўйлиқ» бозори энг катта иш берувчи эканига, у ерда 10 минглаб ўзбекистонликлар тирикчилик қилишига эътибор қаратган.
Бакировнинг таъкидлашича, «Қўйлиқ» бозорини бузишдан аввал янгисини қуриш ва уни тўлиқ ишга тушириш керак.
«Демакки, бозор бузилса улар (10 минглаб фуқаролар назарда тутилган — таҳр.) даромадсиз қолади. Мен катта йўқотишларга учрайдиган мулкдорлар, дўкондорларни айтмаяпман.
Бозор бузишдан аввал янгисини қуриш, тўлиқ ишга тушириш, харидорлар унга ўрганиши ва кейингина уни кўчириш керак. Ишчилар, сотувчилар, ижарачилар, дўкондорлар — ҳамманинг ҳақини адо этган, алдамаган ҳолда», — дейди у.
Иккинчидан, Отабек Бакиров «Қўйлиқ» пойтах аҳолисини сабзавот, мева ва бошқа озиқ-овқат маҳсулотлари билан таъминловчи катта бозор эканини қайд этиб, йирик харидор ва сотувчилар учрашадиган умумий платформа, логистика маркази эканига эътибор қаратган.
Иқтисодчининг хавотирларига кўра, «Қўйлиқ» бозорининг бузулиши пойтахтдаги нархларга «жуда жиддий таъсир кўрсатади».
«Янги логистика шакллангунигача вазият қандай бўлади? Бунга нисбатан қандай чоралар мавжуд?», — дейди у.
Учинчидан, йўлларнинг кенгайтирилиши, кўприклар қурилиши шаҳар транспорт муаммосининг стратегик ечими эмаслиги қайд этилган. Кенг йўллар ва кўприклар бошқа каттароқ муаммоларга олиб бориши таъкидланган.
«Ўзларингиз қурган кўприклар ва кенгайтирган йўлларингизга бир қаранг, қай аҳволдаги транспорт муаммолари яралмоқда. Наҳотки, ўз хатоларинизни ўзингиз кўра олмасангиз?», — дейди у.
Тўртинчидан, «Қўйлиқ» бозорининг ўрнига қуриладиган кўприкнинг макети ва кўриниши, аллақачон, тайёр бўлса-да, бироқ унинг суммаси ва тасдиқланган лойиҳаси йўқлиги сўроқ остига олинган.
«Кейинги масала — тендер. Қани тендер? Қачон эълон қилинади? Ё яна қурилиш бозорини эгаллаб олган учта чўнтак компаниядан бирига тортиқ қилинадими? Гап триллионлаб сумма ҳақида кетмоқда», — дейди иқтисодчи.
Бешинчидан, ноябрь ойида бозорларни сотиш ҳақида режалар эълон қилингани, рўйхатда «Қўйлиқ» ҳам мавжудлиги эслаб ўтилган.
«Сотиладиган бозорлар рўйхатида «Қўйлиқ» ҳам бор. Энди савол: бузиладиган бозорни кимга сотасизлар? Қайси тентак инвестор бузиладиган бозорга харидор бўлади? «Қўйлиқ»ни бузиб, бошқа сотувга тайёрланаётган ўнлаб бозорларнинг нархини ҳам бир пул қилаётганингизни, Ўзбекистонга қанча эҳтимолий зарар келтираётганингизни биласизми? Бу саволлар якуний эмас», — дейди иқтисодчи.
Якунда Отабек Бакиров бозор бузилаётганидан «Қўйлиқ дехқон бозори» АЖнинг 14,3 фоиз, улгуржи бозорнинг 6,8 фоиз акцияларига эгалик қиладиган хусусий акциядорлар хабардормикан, уларнинг ҳуқуқини ким ҳимоя қилади, деган саволларни ҳам ўртага ташлаган.