Тошкент уй-жой ижара бозори: айрим сегментларда ҳудудлар ўртасидаги тафовут икки баробардан юқори
Энг юқори ижара нархлари Тошкентнинг Миробод, Шайхонтоҳур ва Яккасарой туманларида шаклланган. Бунда ҳудуд омили нархга сезиларли таъсир қилишда давом этган.
2026 йил майда Тошкент шаҳридаги уй-жойлар ижара нархи ўртача 550 долларни ташкил этди. Ҳисоб-китоблар Макроиқтисодий ва ҳудудий тадқиқотлар институти томонидан амалга оширилди.
Ўтган ойда пойтахтдаги ўртача ижара қиймати 2025 йил майдагига қараганда 10 фоизга ошган.
Таклиф сезиларли камайди
Ҳудудда май ойида ижара таклифлари сони сезиларли қисқарган. Яъни ўтган ойда ижара бўйича 18,1 мингта эълон берилган. Бу апрелдаги 22,8 мингтага нисбатан қарийб 21 фоизга кам.
Эълонларнинг 42,4 фоизи Мирзо Улуғбек (16,9 фоиз), Миробод (12,9 фоиз), Юнусобод (12,6 фоиз) туманлари ҳиссасига тўғри келган.
Нарх ҳудудга боғлиқлигича қолмоқда
Энг юқори ижара нархлари Тошкентнинг Миробод, Шайхонтоҳур ва Яккасарой туманларида шаклланган. Бунда ҳудуд омили нархга сезиларли таъсир қилишда давом этган. Айниқса, уч хонали, тўрт ва ундан ортиқ хонали уйларда қиммат ҳамда арзон ҳудудлар ўртасидаги тафовут икки баробардан юқори. Масалан, Мирободда бир хонали уй ижараси ойига ўртача 600 доллар. Олмазор, Сергели ва Учтепада эса бу қиймат 350 долларни ташкил этган.
Икки хонали хонадон ижараси Миробод ва Шайхонтоҳурда 700 доллар бўлса, Сергели ва Учтепада 400 доллар атрофида. Уч хонали уйда Миробод ва Шайхонтоҳурда минг долларга, Сергели ва Учтепада 450 долларга бир ой яшаш мумкин. Тўрт ва ундан кўп хонали хонадонлар ижараси Мирободда 1150 доллар, Яккасаройда 1100 доллар, нисбатан арзон ҳудудлардаги нархлар эса 500-550 доллар атрофида шаклланган.
Икки хонали уйга талаб юқори
Таҳлил қилинишича, пойтахтда икки хонали хонадонларга бўлган талаб энг юқори ҳисобланади. Май ойида ижара эълонларининг 86 фоизга яқини икки ва уч хонали хонадонлар ҳиссасига тўғри келган. Аниқроғи, таклифнинг қарийб 59,6 фоизини икки хонали уйлар ташкил этган.
Ўз навбатида хонадонлардаги хоналар бўйича нархлар турлича шаклланган. Мисол учун, бир хонали уйнинг ойлик ижара ҳақи ўртача 400 доллар бўлган. Бу бир йил аввалгидан 14,3 фоизга баланд.
Икки хоналилар ижараси 500 доллар ва йил давомида нарх ўзгармаган. Уч хонали уйлар ижараси 700 доллар бўлиб, сўнгги бир йилда нарх ўзгариши кузатилмаган.
Тўрт ва ундан кўп хонали уйлар ижараси ўртача 800 доллар. Мазкур сегментда йиллик нархи ўсиши қарийб 20 фоизга етган.
Умуман олганда, таҳлилда мулкдорлар ижара нархини белгилашда туман ва хона сонига алоҳида эътибор бераётгани қайд этилган.
