Қўйлиқ ва Чорсу бозорларига асосан қайси маҳсулотлар келтириляпти?
Иқтисодий тараққиёт ва камбағалликни қисқартириш вазирлиги бозорларга келтирилаётган маҳсулотлар бўйича таҳлил эълон қилди.
Иқтисодий тараққиёт вазирлиги томонидан 1–13 февраль кунлари Қўйлиқ ва Чорсу деҳқон бозорларида асосий истеъмол товарларининг улгуржи нархлари бўйича кузатув натижалари эълон қилиниб борилди. Вазирлик бозорларга келтирилаётган маҳсулотлар таркиби юзасидан таҳлилий маълумот берди.
Тезкор маълумотларга асосан, Қўйлиқ бозорига 1–13 февраль кунлари ҳудудлардан жами 9,2 минг тонна маҳсулот, хусусан, 4,5 минг тонна картошка, 3,0 минг тонна пиёз, 544 тонна карам ва 795 тонна сабзи келтирилган.
Шундан, Тошкент вилоятидан 203 тонна картошка, 851 тонна пиёз, 544 тонна карам, 297 тонна сабзи, Самарқанд вилоятидан 1597 тонна пиёз, Жиззах вилоятидан 586 тонна пиёз, Қашқадарё вилоятидан 202 тонна, Сурхондарё вилоятидан 187 тонна ва Сирдарё вилоятидан 109 тонна сабзи маҳсулотлари етказиб берилган.
Шунингдек, Қўйлиқ бозорига Қозоғистондан 578 тонна, Қирғизистондан 292 тонна, Афғонистондан 599 тонна, Покистондан 2196 тонна ва Эрон давлатидан 670 тонна картошка келтирилган.
Шу билан бирга, ҳудудлардан Чорсу деҳқон бозорига 1–13 февраль кунлари жами 143,8 тонна, шу жумладан 115,6 тонна мол гўшти ва 28,2 тонна қўй гўшти келтириб сотилган.
Аввалроқ Ўзбекистонда озиқ-овқат маҳсулотлари ишлаб чиқарувчиларга субсидиялар ажратилиши хабар қилинганди. Шунингдек, Сенат айрим маҳсулотларни ҚҚСдан озод қилувчи қонунни маъқуллагани ҳақида хабар берилди.
