«Росавиация» Британияга Россия ҳаво ҳудудида парвоз қилишни тақиқлади
Чеклов 25 февраль куни Москва вақти билан соат 11:00дан кучга кирган.
Федерал ҳаво транспорти агентлиги Британия самолётларига Россия ҳаво ҳудудидан, жумладан, транзит парвозлар учун фойдаланишни тақиқлади. Бу ҳақда РБК ёзмоқда.
Қайд этилишича, чеклов 25 февраль куни Москва вақти билан соат 11:00дан кучга кирган.
«Россия Федерацияси ҳаво ҳудудидан Буюк Британия билан боғланган ёки Буюк Британияда рўйхатдан ўтган шахсга тегишли, ижарага олинган ёки эксплуатация қилинган самолётларнинг парвозлари учун фойдаланишга чеклов киритилди», — дейилади хабарда.
Федерал ҳаво транспорти агентлиги бир кун олдин Лондонга Россия самолётларининг Буюк Британия устидан парвозларини чеклашни муҳокама қилиш таклифини юборганини, аммо 25 февраль куни эрталаб улар салбий жавоб олганини маълум қилган.
Аввалроқ йирик автоконцернлар Россияга автомобиль етказиб беришни тўхтатгани хабар қилинганди. Шунингдек, Apple Россия банкларининг иловаларини блоклашни бошлагани ҳақида хабар берилганди.
