Шавкат Мирзиёев Сердар Бердимуҳамедовни қабул қилди
Сердар Бердимуҳамедов Вазирлар Маҳкамаси раисининг ўринбосари, Туркманистон Президентининг ўғли ҳисобланади.
Президент Шавкат Мирзиёев 17 январь куни амалий ташриф билан Тошкент шаҳрида бўлиб турган Туркманистон Вазирлар Маҳкамаси раисининг ўринбосари Сердар Бердимуҳамедовни қабул қилди. Бу ҳақда Президент матбуот химати хабар берди.
Учрашув аввалида давлат раҳбари Ўзбекистон ва Туркманистон ўртасидаги дўстлик, яхши қўшничилик ва стратегик шериклик муносабатлари кейинги йилларда изчил ривожланиб бораётганини алоҳида қайд этди.
«Юқори мартабали меҳмон қабул учун самимий миннатдорлик билдириб, Туркманистон Президенти Гурбангули Бердимуҳамедовнинг саломи ва энг эзгу тилакларини етказди ҳамда Туркманистон етакчисининг барча йўналишларда жадал ривожланиб бораётган Туркманистон-Ўзбекистон алоқаларига юксак баҳо берилган мактубини топширди», дейилади хабарда.
Мактубда Туркманистон раҳбари икки мамлакатнинг халқаро сиёсат ва минтақавий муносабатлар борасидаги позициялари яқин ва ўхшашлигини алоҳида қайд этган. Учрашувда олий даражада эришилган келишувларнинг амалга оширилиши кўриб чиқилди.
Ўзаро савдо ҳажмини ошириш, саноат, энергетика, сув ва қишлоқ хўжалиги соҳаларида янги кооперация лойиҳаларини рўёбга чиқариш ҳамда икки мамлакат транзит салоҳиятидан самарали фойдаланиш бўйича ҳамкорликни мустаҳкамлаш масалалари ва бу борадаги амалий чора-тадбирларга алоҳида эътибор қаратилди. Ҳудудлараро алоқалар ва маданий-гуманитар алмашинувни ривожлантириш муҳим экани таъкидланди.
