Британия-Голландия компанияси Shell ва Британиянинг BP компаниялари Россия нефть ва газини сотиб олиш бўйича янги битимлар тузишни тўхтатишини эълон қилди. Бу ҳақда Bloomberg хабар берди.

Shell Россия нефтини сотиб олишни тўхтатаётганини ва Россия углеводородлари, жумладан, нефть, нефть маҳсулотлари, газ ва суюлтирилган газ билан боғлиқ лойиҳаларни босқичма-босқич тўхтата бошлаганини эълон қилди.

«Агар ҳукуматлар томонидан бошқача кўрсатма бўлмаса, биз зудлик билан спот бозорда Россия хом нефтини сотиб олишни тўхтатамиз ва фючерс шартномаларини янгиламаймиз. Шу билан бирга, ҳукуматлар билан яқиндан маслаҳатлашган ҳолда, Россия маҳсулотини чиқариб ташлаш учун хом нефть етказиб бериш занжиримизни ўзгартирамиз», — деди компания бош директор Бен ван Берден.

Унинг таъкидлашича, компания Россиядаги ёқилғи қуйиш шохобчаларини ҳам ёпади ҳамда самолёт ёқилғиси ва ёқилғи-мойлаш материаллари билан боғлиқ бизнесни тўхтатади. Ван Берденнинг сўзларига кўра, компания бу чораларни имкон қадар тезроқ амалга оширишни бошлайди, бироқ бу жараён бир неча ҳафта давом этиши ва Shell нефтни қайта ишлаш заводи унумдорлигининг пасайишига олиб келиши мумкин.

Shell хабарлари компаниянинг ўтган ҳафта Россия нефтини сотиб олгани сабабли танқидга учрагандан сўнг кескин ўзгарганини кўрсатади. Компания раҳбари 8 март куни бензин ва дизель ёқилғиси ишлаб чиқариш учун Россия нефтининг партиясини сотиб олиш қарорини нотўғри деб атади.

«Қарор таъминот хавфсизлигини ҳисобга олган ҳолда қабул қилинганига қарамай, бу нотўғри эди ва биз бундан афсусдамиз», — деди у.

Британиянинг BP компанияси, ўз навбатида, аста-секин Россиядан хом ашё етказиб беришдан воз кечиш ва «имконияти бўлса» Россия байроғи остида кемаларни ижарага олмаслик ниятини эълон қилди. Аммо компания вакилининг таъкидлашича, истеъмолчиларга энергия етказиб бериш хавфсизлигига таҳдид юзага келган тақдирда BP Россия билан ҳамкорликни истисно этмайди.

TotalEnergies бош директори Патрик Пуянненинг маълум қилишича, BP Россия нефтини сотиб олишни тўхтатган, бироқ Германиядаги нефтни қайта ишлаш заводларидан бири Россиядан нефть олишни давом эттиради, чунки бу маҳсулотларга муқобил йўқ. Engie бош директори Кетрин Макгрегор компания Россия газини сотиб олишда давом этишини айтди, чунки унинг мижозлари, айниқса Европадагилари, ушбу таъминотга боғлиқ.

Аввалроқ Зеленский Европани Россия нефтидан воз кечишга чақиргани хабар қилинганди. Шунингдек, АҚШ ва Европа Россия нефтидан воз кечишни муҳокама қилаётгани ҳақида хабар берилди.