Статистика агентлиги ЯИМ ҳамда саноат статистикалари ўртасидаги фарқликларни тушунтирди
Статистика агентлиги ЯИМ ҳамда саноат бўйича йиллик барча маълумотлар ялпи ички маҳсулот ҳамда ишлаб чиқаришнинг умумий ҳажмларида тўлиқ инобатга олинганини маълум қилди
Статистика агентлини ялпи ички маҳсулот (ЯИМ) статистикаси ҳамда саноат статистикаси ўртасида фарқликларга эътибор қаратилган Bakiroo Telegram каналидаги постга муносабат билдирди.
Маълум қилинишича, агентлик томонидан 2022 йил якунлари бўйича эълон қилинган «Ўзбекистон Республикасида ЯИМни ишлаб чиқариш» номли йиллик таҳлилий пресс-релизнинг 14-саҳифасида йирик корхоналар томонидан ишлаб чиқарилган 70 995,4 миллион киловатт-соат ҳажмга кичик корхоналар томонидан ишлаб чиқарилган 3 300,8 миллион киловатт-соат ҳажмларни қўшган ҳолда жами 74 296,2 миллион киловатт-соат электр энергияси тўғрисида маълумотлар келтирилган.
«‘Саноат ишлаб чиқариши’ номли йиллик пресс-релизнинг 20-саҳифасидаги 70 995,4 миллион киловатт-соат электр энергияси ҳажми фақат йирик корхоналар томонидан ишлаб чиқарилган ҳажмларни ифодалайди», дейилади хабарда.
Шунингдек, Статистика агентлиги ишлаб чиқарилган автомобиллар сонидаги қарқликларга ҳам тўхталиб ўтди.
«‘Ўзбекистон Республикасида ялпи ички маҳсулотни ишлаб чиқариш’ номли йиллик таҳлилий пресс-релизнинг 14-саҳифасида эълон қилинган 328 118 дона енгил автомобиллар сонида 20 941 дона махсус енгил автомобилларни қўшган ҳолда келтирилган. Ушбу маълумотлар ‘Саноат ишлаб чиқариши’ номли йиллик пресс-релизнинг 9-саҳифасида енгил автомобиллар сонида махсус енгил автомобилларни қўшмаган ҳолда 307 177 дона этиб келтирилган».
Агентликка кўра, ушбу келтирилган маълумотлар ЯИМ ҳамда ишлаб чиқаришнинг умумий ҳажмларида тўлиқ инобатга олинган.
Мавзуга доир: Ўзбекистонда чиқинди газидан электр ишлаб чиқарилади
