«Сувмаш» АЖ устав капиталидаги 47 фоиз акциялар пакетини музокараларга оммавий таклиф этиш орқали сотиш режасини эълон қилинди. Бу ҳақда Давлат активларини бошқариш агентлиги матбуот хизмати хабар берди.

Маълум қлинишича, Deloitte халқаро компанияси ушбу битим бўйича агентлик маслаҳатчиси вазифасини бажаради. Агентлик томонидан берилган ваколатга асосан «UzAssets инвестиция компанияси» сотув жараёнларини маслаҳатчи билан биргаликда ташкил этади. Dentons юридик фирмаси UzAssets активларни хусусийлаштириш бўйича фаолиятига ҳамроҳлик қилади.

Сотув жараёни барча манфаатдор томонлар учун очиқ бўлган таклифларни тақдим этишнинг рақобатга асосланган жараёни сифатида ташкил этилган. Жараён манфаатдор харидорлардан таклифларни қабул қилиш ва бир ёки бир нечта манфаатдор иштирокчилар билан кейинги музокаралардан иборат бўлади.

Маълумот учун «Сувмаш» насос агрегатлари, тегишли ускуналар ва бутловчи қисмларни ишлаб чиқариш ва таъмирлашга ихтисослашган бўлиб, бозорда 1971 йилдан бери ўз фаолиятини кўрсатади. 2020 йил якуни бўйича компаниянинг даромади 45 миллиард сўмдан, соф фойдаси эса 4,3 миллиард сўмдан ошди.

Аввалроқ «Фарғонаазот»нинг устав капиталидаги акция пакетлари хусусийлаштирилиши ҳақида хабар берилганди.