Ташқи иқтисодий алоқалардаги вазият валюта бозорини мувозанатлаштирмоқда — Марказий банк
Ўзбекистонда январь-июль ойларида экспорт ва импорт ҳажми ўсувчи тенденция кўрсатди. Марказий банк ташқи иқтисодий алоқаларда кузатилаётган вазият ички валюта бозорини мувозанатлаштираётганини маълум қилди.
Ташқи иқтисодий алоқалардаги вазият валюта бозорини мувозанатлаштирмоқда. Бу ҳақда Марказий банкнинг 8 сентябрдаги йиғилишида маълум қилинди.
Қайд этилишича, ташқи иқтисодий шароитлардаги мавжуд ноаниқликлар мамлакат иқтисодиётига ҳам ижобий, ҳам салбий таъсир кўрсатмоқда.
Хусусан, глобал логистика хизматлари нархлари ошиши давом этаётган бўлса-да, асосий озиқ-овқат маҳсулотлари нархларининг ўсиши секинлашмоқда ва айрим турлари бўйича пасаймоқда.
Хабарга кўра, 2022 йилнинг январь-август ойларида ташқи савдо операциялари бўйича экспорт тушумларида ҳам, импорт учун тўловларда ҳам ўсувчи тенденциялар кузатилган.
Экспорт тушумлари ўтган йилнинг мос даврига нисбатан 37 фоизга, импорт тўловлари эса 27 фоизга ва трансчегаравий пул ўтказмалари ҳажми 2,1 баробарга ошган.
Ташқи иқтисодий алоқаларда кузатилаётган ушбу вазият, ички валюта бозорини мувозанатлаштириб, миллий валюта алмашув курси барқарорлигига ижобий таъсир кўрсатаётгани маълум қилинди.
Эслатиб ўтамиз, аввалроқ Марказий банк асосий ставкани 15 фоиз даражасида ўзгаришсиз қолдирганди.