Twitter яқин ойларда твитларни таҳрирлаш функциясини синовдан ўтказа бошлайди
Ҳозирча функциядан фақат Twitter Blue абонентлари фойдаланиши мумкин.
Twitter ижтимоий тармоғи фойдаланувчиларга ўз твитларини таҳрирлаш имконини берувчи функцияни синовдан ўтказишга қарор қилди. Бу ҳақда компания вакиллари Twitter Communications расмий аккаунтида хабар бермоқда.
«Ҳозир ҳамма сўрамоқда… Ҳа, биз ўтган йилдан бери таҳрирлаш функцияси устида ишлаяпмиз! Йўқ, биз буни сўровномадан кейин бошламадик», — деб ёзди Twitter вакиллари Илон Маскнинг сўровномасига ишора қилиб.
Ҳозирча таҳрирлаш функциясидан фақат Twitter Blue абонентлари учунгина фойдаланиш мумкин бўлади. Twitter Communications жамоасининг таъкидлашича, бу «нима ишлаши, нима ишламаслиги ва нима қилиш мумкинлиги»ни тушуниш учун зарур.
Twitter вакиллари эслаб ўтган сўровномани Tesla бош директори Илон Маск ўтказганди. У фойдаланувчилардан «платформада таҳрирлаш тугмаси бўлишини хоҳлайсизми», деб сўраган.
Бундан олдин тадбиркор Twitter’даги деярли 3 миллиард долларлик 9,2 фоиз улушга эга бўлган эди. Бу миқдордаги акциялар Маскни компаниядаги энг йирик инвесторга айлантиради, бундан ташқари, миллиардер ижтимоий тармоқнинг директорлар кенгашидан ҳам жой олди.
Аввалроқ Twitter’га ҳамкорликда твит ёзиш функцияси қўшилиши хабар қилинганди.