Ural Airlines Екатеринбургдан Ўзбекистоннинг олти шаҳрига парвозларни амалга ошириши мумкин
Ural Airlines авиакомпанияси 2023 йил ёзида авиаташувчи Қарши, Фарғона, Нукус, Навоий ва Урганч (ҳафтасига тўрт мартагача), шунингдек, Бухоро (уч мартагача) йўналишларида парвоз қила олади
Ural Airlines авиакомпанияси Екатеринбургдан Ўзбекистоннинг олти шаҳрига парвозларни амалга оширишга рухсат олди, деб хабар бермоқда «Росавиация».
Қайд этилишича, 2023 йил ёзида авиаташувчи Қарши, Фарғона, Нукус, Навоий ва Урганч (ҳафтасига тўрт мартагача), шунингдек, Бухоро (уч мартагача) йўналишларида парвоз қила олади.
Бундан ташқари, авиакомпанияга Екатеринбургдан Наманган (ёзда 3 тадан 5 тагача) ва Самарқандга (қишда 3 тадан 7 тагача) рейслар сонини оширишга рухсат берилди.
Умуман олганда, Ural Airlines Россиянинг 13 та шаҳридан Ўзбекистонга парвоз қилиш учун рухсат олган. Шундай қилиб, Екатеринбургдан ташқари, Краснодар, Грозний, Нижний Новгород, Нижневартовск, Сочи, Қозон, Махачқалъа, Минералние Води, Челябинск, Жуковский, Ростов-на-Дону каби шаҳарлардан ҳам рейслар йўлга қўйилиши мумкин. Санкт-Петербургдан парвозлар сони ҳам оширилади.
Аввалроқ Uzbekistan Airways 2023 йил 7 февралдан 10 апрелгача Тошкент—Нью-Йорк ва қайтиш йўналиши бўйича амалга ошириладиган барча авиақатновларнинг эконом ва бизнес-класс тарифларига 20 фоиз чегирма эълон қилгани ҳақида хабар берилганди.
Шунингдек, компания Тошкент—Омск—Тошкент йўналиши бўйича 26 мартдан ҳафтасига бир марта, Тошкент—Нижний Новгород—Тошкент йўналиши бўйича 28 мартдан ҳафтасига икки марта мунтазам парвозларни амалга ошириши ҳақида хабар берилганди. Бундан ташқари, Uzbekistan Airways 2023 йил 28 мартдан бошлаб Тошкент—Милан—Тошкент ва 31 мартдан Тошкент—Париж—Тошкент йўналишида авиақатновларни амалга оширишни бошлайди. Парвозлар ҳафтада икки марта — сешанба ва жума кунлари амалга оширилиши белгиланган.