Uzbekistan Airways Қозоғистоннинг намойишлар авж олган Оқтов шаҳрига қатновларни бекор қилди
Қозоғистондаги намойишлар сабаб Оқтов аэропорти ёпилган.
Uzbekistan Airways Қозоғистоннинг намойишлар авж олган Оқтов шаҳрига 5 январь кунги авиақатновларни бекор қилди. Бу ҳақда компания матбуот хизмати хабар берди.
Таъкидланишича, Оқтов халқаро аэропорти халқаро парвозларни қабул қилишни ва амалга оширишни ёпганлиги муносабати билан 2022 йил 5 январь куни амалга оширилиши режалаштирилган HY-9725/9726 Урганч–Оқтов–Урганч йўналиши бўйича мунтазам қатновлари бекор қилинган.
Компания матбуот хизмати ушбу йўналиш бўйича парвозларни амалга ошириш кунлари ҳақидаги қўшимча маълумот кейинроқ тақдим этилишини билдирган.
«Тўғри тушунишингизга умид қиламиз», дейилади хабарда.
Қайд этилишича, йўловчилар 5 январь кунига Оқтовга бекор бўлган парвозлар авиачипталарининг тўлиқ қийматини чипта сотиб олинган жойда қайтариб олишлари ёки бошқа санага бепул қайта бронлаш ҳуқуқига эга.
Маълумот учун, Қозоғистонда 2 январь куни суюлтирилган газ нархи ошиши ортидан норозиликлар намойишлари авж олмоқда. Президент Қосим-Жўмарт Тўқаев бош вазир Асқар Мамин бошчилигидаги ҳукуматни истеъфога чиқарди.