Вазирлар Маҳкамасининг 2021 йил 21 октябрдаги қарори билан «Uzbekistan airways technics» МЧЖ эркин божхона зонаси фаолияти тартиби тўғрисидаги низом тасдиқланди. Бу ҳақда Norma хабар берди.

Маълум қилинишича, Президентнинг «Фуқаро авиацияси корхоналарини трансформация қилиш ва қўллаб-қувватлаш чора-тадбирлари тўғрисида» 2021 йил 30 апрелдаги қарорига мувофиқ «Uzbekistan Airways Technics» МЧЖнинг 39 га майдони ҳудудида эркин божхона зонаси (ЭБЗ) ташкил этилган эди.

Маълум бўлишича, қабул қилинган «Uzbekistan airways technics» МЧЖ ЭБЗ ҳудудига товарларни олиб кириш, олиб чиқиш тартиби тўғрисидаги низом қуйидагиларни назарда тутади:

• ЭБЗ ҳудудида фаолият юритувчи тадбиркорлик субъектларининг ҳуқуқ ва мажбуриятлари;
  божхона назоратини таъминлаш талаблари ва шартлари;
• эркин божхона зонаси ҳудудига товарларни олиб кириш ва олиб чиқиш, тегишли божхона режимларига расмийлаштириш ва ҳаво кемаларини таъмирлашда фойдаланиш тартиби;
• ЭБЗ ҳудудига олиб кирилган ва олиб чиқилган товарлар ва хизматлар учун валюта операцияларини амалга ошириш тартиби.

Эркин божхона зонасида:

• халқаро ҳуқуқий ва техник меъёрларга мувофиқ барча хорижий ҳаво кемалари ва уларнинг алоҳида агрегатларини таъмирлаш учун зарур бўлган авиатехника эҳтиёт қисмлари эркин алмаштирилади;
• маҳаллий авиакомпанияларнинг ҳаво кемаларини ҳамда уларнинг қисм ва агрегатларини таъмирлашга зарур бўлган авиатехника эҳтиёт қисмлари эркин божхона зонаси чегарасидан чиқмаган ҳолда харид қилиниб, «эркин муомалага чиқариш» божхона режимига расмийлаштирилган ҳолда фойдаланилади;
• ушбу божхона зонасига четдан келтириладиган авиатехника эҳтиёт қисмлари «эркин божхона зонаси» божхона режимига расмийлаштириш орқали жойлаштирилади ҳамда истисно тариқасида, сертификатлар ва рухсат этиш хусусиятига эга ҳужжатлар талаб этилмайди;
• таъмирлаш мақсадида ЭБЗга олиб кириладиган ҳаво кемаларининг (шу жумладан, уларнинг қисм ва агрегатлари) кириб-чиқишида божхона назорати уларни тегишли божхона режимларига расмийлаштирмаган ҳолда амалга оширилади.

Ҳужжат қонун ҳужжатлари маълумотлари миллий базасида эълон қилинган ва 2021 йил 21 октябрдан кучга кирган.

Аввалроқ Ўзбекистонда сунъий мўйна ва шиша ипларга импорт божи нолга тенглаштирилганди. Шунингдек, Ўзбекистонда айрим озиқ-овқат маҳсулотлари ҚҚСдан озод қилиниши маълум бўлди.