Жаҳон банки АҚШ, евроҳудуд ва Хитойда иқтисодий ўсиш бўйича ўз прогнозларини пасайтирди. Бу ҳақда Reuters хабар берди.

Ташкилот маълумотларга кўра, жаҳон иқтисодиётининг қайта оёққа туришига янги ковид штаммлари, юқори ташқи қарз ва ўсиб бораётган тенгсизлик таҳдид солмоқда.

Жаҳон банкининг янги ҳисоботида айтилишича, глобал ўсиш 2021 йилги 5,5 фоиздан 2022 йилда 4,1 фоизга ва 2023 йилда 3,2 фоизга «сезиларли» секинлашиши кутилмоқда. Сабаби товарлар ва хизматларга бўлган талаб деярли тугаган ва ҳукуматлар, пандемия бошида бўлгани каби, катта молиявий ва монетар ёрдам кўрсатишнинг янги босқичдан воз кечмоқда.

Қайд этилишича, Жаҳон банкининг жорий прогнози ташкилот 2021 йил июнь ойида ҳисоблаган кўрсаткичлардан 0,2 фоизга паст.

Жаҳон банки илғор мамлакатлар иқтисодиёти ўсиши 2022 йилда 3,8 фоизгача секинлашиши ва 2023 йилда 2,3 фоизгача пасайишини прогноз қилмоқда. Бироқ уларнинг ишлаб чиқариш ва инвестициялари ҳажми 2023 йил охирига бориб пандемиядан олдинги тенденцияга қайтишини таъкидламоқда.

Шаклланаётган бозорга эга мамлакатлар ва ривожланаётган мамлакатларда эса иқтисодий ўсиш 2022 йилда 4,6 фоизгача пасаяди. Шундан сўнг 2023 йилда 4,4 фоизни ташкил этади. Бу кўрсаткичларнинг пандемиядан олдинги тенденциядан паст бўлишини англатади.

Жаҳон банки ҳисоботи муаллифи Айҳан Кўсенинг айтишича, «омикрон»нинг тез тарқалиши давом этаётган пандемиядан далолат беради, у кучайиб бормоқда ва янги эпидемиялар соғлиқни сақлаш тизимларини енгиб, глобал иқтисодий ўсиш прогнозини яна 0,7 фоизга камайтириши мумкин.

«Иқтисодий ўсиш суръатида яққол секинлашув кузатилмоқда. Сиёсий ёрдам камайиб бормоқда ва олдинда бизни кўплаб хавф-хатарлар кутмоқда», — дея таъкидлаган Кўсе.

Унинг сўзларига кўра, жаҳон регуляторлари томонидан фоиз ставкаларининг ошиши қўшимча таҳдид яратмоқда. Айниқса, Жаҳон банки марказий банкларнинг 2022 йилнинг баҳорида — аввалги кутилганидан бир неча ой олдин — қаттиққўл сиёсатга ўтишидан хавотирда.

Аввалроқ Жаҳон бўйлаб озиқ-овқат нархи 10 йил ичидаги максимал даражадан ошиб кетгани хабар қилинганди. Шунингдек, Жаҳон иқтисодиёти 2022 йилда илк марта 100 триллион доллардан ошиши ҳақида хабар берилди.