Жаҳон иқтисодиёти 2022 йилда илк марта 100 трлн доллардан ошади
Cebr’нинг прогнози Халқаро Валюта Жамғармасининг ҳисоб-китобларига мос келган.
Жаҳонда иқтисодий ишлаб чиқариш ҳажми 2022 йили биринчи марта 100 триллион доллардан ошади. Бу ҳақда Reuters Британиянинг Cebr консалтинг компанияси ҳисоботига таяниб хабар берди.
Таҳлилчиларнинг таъкидлашича, Хитой АҚШни ортда қолдириб, дунёнинг биринчи рақамли иқтисодиётига айланади, аммо бу прогноз қилинганидан кўпроқ вақт олади.
Cebr’нинг прогнози Халқаро Валюта Жамғармасининг ҳисоб-китобларига мос келган: доллар курси билан жорий нархларда ўлчанадиган глобал ялпи ички маҳсулот 2022 йилда 100 триллион доллардан ошади.
«Хитой 2019 йилги World Economic League Table жадвалида прогноз қилинганидан икки йил кечикиб, 2030 йилда жаҳоннинг етакчи иқтисодиётига айланади», дейилади хабарда.
Ҳиндистон эса 2022 йилда Францияни, 2023 йилда Буюк Британияни ортда қолдириб, 2031 йилда дунёнинг учинчи йирик иқтисодиётига айланади. 2036 йилда Буюк Британия иқтисодиёти Брекситга қарамай, Францияникидан 16 фоизга ортиқ бўлади.
Бундан ташқари, Германия 2033 йилда энг йирик иқтисодиётлар рўйхатида Японияни қувиб ўтади. Россия 2036 йилга келиб кучли ўнталикка кириши мумкин.
«2020-йилларнинг энг катта саволи мамлакатлар инфляция билан қандай курашишига боғлиқ», дейилади хабарда.
Аввалроқ дунё бойликларининг миллиардерлар қўлидаги улуши рекорд даражага кўтарилгани хабар қилинганди.
