Жиззах вилоятининг Ғаллаорол туманида фермернинг 3 гектар ердаги арпасини бузиб ташлаш талаб қилинди. Бу ҳақда Олий Мажлис Сенати матбуот хизмати хабар берди.

Маълум қилинишича, Жиззах вилояти Ғаллаорол туманидаги фермер хўжалиги томонидан экилган арпа бошоғи кўкариб чиққан ҳолида бузиб ташланиши талаб қилинаётгани ҳақида интернет тармоқларида хабар тарқалган.

Унда тумандаги фермер хўжалиги ердан унумли фойдаланиш мақсадида ўзига тегишли даланинг бир қисмига арпа бошоғини эккани ва ушбу экин майдонини туман қишлоқ хўжалиги соҳаси мутасаддилари бузиб ташлаш талабини қўяётгани айтилган.

Таъкидланишича, Сенатнинг Аграр, сув хўжалиги масалалари ва экология қўмитаси мазкур ҳолатни назоратга олиб, ҳолат жойига чиққан ҳолда ўрганилган.

Натижада «Ёнғоқзор неъмати» фермер хўжалиги раҳбари томонидан фермер хўжалигига тегишли бўлган 9,0 гектар суғориладиган ер майдони ёнғоқ кўчатлари экиш учун ажратилгани маълум бўлган.

Бироқ, фермер хўжалиги томонидан ёнғоқзор экиш учун ажратилган ернинг 3 гектарига арпа экилиб, аввал берилган ваъда бажарилмаган. Шундай бўлсада, фермер хўжалиги томонидан етиштирилаётган арпа ҳосили пишиб етилгунга қадар сақлаб қолинадиган бўлган.

Шунингдек, масъуллар фермерга экин майдонидан унумли фойдаланиш бўйича ўз тавсияларини берган.

Аввалроқ Сирдарёда ҳокимлик фермернинг ерини ноқонуний олиб қўйгани аниқлангани хабар қилинганди.