Zoom’нинг даромади 1 млрд доллардан ошди
Ушбу кўрсаткич 2020 йилнинг учинчи чорагидаги кўрсаткичдан 35 фоизга юқори
Zoom 2021 йилнинг учинчи чораги учун молиявий натижаларни эълон қилди. Бу ҳақда CNBC хабар бермоқда.
Маълум қилинишича, компаниянинг даромади 1,05 миллиард долларни ташкил этган. Бу 2020 йилнинг учинчи чорагидаги кўрсаткичдан 35 фоизга юқори. Компаниянинг соф даромади 71 фоизга ўсиб, 340,3 миллион долларни ташкил қилган. Зоом тўртинчи молиявий чорак учун даромад 19 фоизга ўсишини башорат қилмоқда.
Бироқ кучли молиявий ва операцион натижаларга қарамай, компания ўтган чоракда 2018 йилдан бери энг секин ўсишни қайд этди. Ҳисоботдан кейин Zoom акциялари нархи 7 фоизга тушиб, 227 долларни ташкил этди.
Zoom шунингдек, булутли алоқа маркази дастурий таъминот провайдери Five9’ни 14,7 миллиард долларга сотиб олиш режаси бекор бўлганини маълум қилди. Сентябрь ойида АҚШ Адлия вазирлиги шартномадан сўнг Zoom оладиган лицензиялар ва ҳужжатлар АҚШ миллий хавфсизлигига таъсир қилиши мумкинлиги бўйича тергов бошлади.
Регуляторнинг даъволари орасида Хитой билан алоқалар бор. Текширувдан сўнг битим 5 йилга «музлатиб қўйилиши» мумкин.
Аввалроқ Zoom бепул версия фойдаланувчиларига реклама кўрсатишни бошлаши ҳақида хабар берилганди.
