Дунёнинг энг бадавлат миллиардери Илон Маскнинг SpaceX компанияси 337,4 миллион доллар маблағ йиғди, деб хабар бермоқда Reuters агентлиги.

SpaceX сўнгги молиялаштириш босқичига оид тафсилотлар ҳақидаги сўровга жавоб бермаган. Апрель ойида компания акциядорлардан 1,6 миллиард долларга яқин маблағ жалб қилганди. У ўзининг асосий инвесторлари сифатида Alphabet (Google’нинг бош компанияси) ва Fidelity фондини келтирган. 

Маскнинг ракета ва космик компанияси Жефф Безоснинг Blue Origin компанияси ва Ричард Брэнсоннинг Virgin Galactic компанияси билан рақобатлашади. Ҳар учала компания тинч аҳолини коинотга муваффақиятли учиришга эришган.

Morgan Stanley маълумотларига кўра, 2040 йилга бориб космик саноат иқтисодиёти 1 триллион долларга етиши мумкин. CNBC маълумотларига кўра, SpaceX 100 миллиард долларга баҳоланган.