Mercedes-Benz компанияси қувват захираси 1000 километр бўлган электромобиль прототипини намойиш этди. Бу ҳақда Financial Times хабар берди.

Маълум қилинишича, компания ўз мижозларга зарядлаш инфратузилмаси йўқлигининг электромобиль сотиб олишга тўсқинлик қилмаслиги кераклигини кўрсатмоқчи. Таъкидланишича, бозордаги аксарият электромобиллар 200–300 миля (тахминан 321–482 километр) юриш захира масофасига эга.

Қайд этилишича, автомобиль ишлаб чиқарувчиси реал транспорт шароитларининг ички симуляцияси ёрдамида диапазонни ҳисоблаб чиққан. Компаниянинг маълум қилишича, 2022 йилнинг баҳорида у Vision EQXX’нинг йўл синовлари учун версиясини намойиш этади.

Хабарга кўра, электромобиль Mercedes-Benz’нинг «Формула-1» ва «Формула Е» жамоалари билан биргаликда яратилган. Хусусан, модель томи қуёш батареялари билан жиҳозланган, салонга автомобилнинг бутун эни бўйлаб 47,5 дюймли экранли мультимедиа тизими ўрнатилган.

Автомобиль оғирлиги 1750 килограммга тенг. Энергия истеъмоли эса 100 километр учун 10 киловатт/соатни ташкил этади.

Компания ишлаб чиқариш режаларини ошкор этмаган.

Аввалроқ Mercedes-Benz eVito электрофургонининг янги версиясини тақдим этгани хабар қилинганди. Шунингдек, Mercedes-Benz компанияси SL моделининг янги авлодини намойиш қилгани ҳақида хабар берилди.