BMW 2015 йилдан бери биринчи марта премиум автомобиллар савдоси бўйича Mercedes’дан ўзиб кетганини эълон қилди. Бу ҳақда Bloomberg хабар берди.

Маълум қилинишича, BMW бошқа автомобиль ишлаб чиқарувчиларга қараганда глобал яримўтказгичлар тақчиллигидан камроқ зарар кўрган

«Биз 2021 йилда BMW брендининг жаҳон премиум автомобиль сегментида биринчи ўринни эгаллаганини эълон қилишдан фахрланамиз», — деган компаниянинг Мюнхендаги сотувлар бўлими раҳбари Питер Нота.

Қайд этилишича, BMW компанияси ҳали йил бўйича батафсил сотув ҳисоботларини эълон қилганича йўқ. Компания вакилига кўра, улар 12 январда эълон қилинади. Бироқ йилнинг кўп қисмида BMW Mercedes’дан автомобиль савдоси бўйича ўзиб кетган. Учинчи чорак якунига кўра, Мюнхендаги автомобиль ишлаб чиқарувчиси 1,8 миллион дона премиум автомобиль сотган, унинг штутгартлик рақиби эса 1,5 миллион дона сотишга эришган.

Хабарга кўра, 2021 йилнинг тўққиз ойида BMWбренди остида 1,7 миллион автомобиль сотилган. Бу Daimler’нинг Mercedes-Benz кўрсаткичидан 112 минг та автомобилга кўпдир.

Таъкидланишича, BMW бошқа автомобиль ишлаб чиқарувчиларнинг саноат линияларида узилишларга олиб келган глобал яримўтказгич танқислигидан рақобатчиларига қараганда камроқ зарар кўрган.

Шу билан бирга, бир қатор компанияларнинг чиплар инқирози чўққисининг қийин учинчи чоракдан кейин тугаши ҳақидаги прогнозлари ўзини оқламаган. Mercedes матбуот хизмати хабар беришича, саноатдаги бутловчи қисмлар тақчиллиги 2022 йилнинг биринчи ярмида ҳам сезилишда давом этади.

Аввалроқ BMW’нинг соф даромади учинчи чоракда 42,4 фоизга ошгани хабар қилинганди. Шунингдек, BMW ва Audi McLaren’ни сотиб олишга қизиқиш билдираётгани ҳақида хабар берилди.