Ўзбекистонда этил спирти ишлаб чиқариш соҳасидаги давлат монополияси тугатилди. Бу ҳақда Norma хабар берди.

Маълум қилинишича, Президент томонидан 2021 йил 30 декабрдаги «Ўзбекистон Республикаси Президентининг айрим ҳужжатларига ўзгартириш ва қўшимчалар киритиш, шунингдек, баъзиларини ўз кўчини йўқотган деб ҳисоблаш тўғрисида»ги фармон имзоланган.

Ушбу ҳужжат билан бир қатор ўзгартиришлар киритилган. Биринчидан, Президентнинг 2017 йил 17 январдаги фармонига киритилган ўзгартиришга кўра, «Давархитектқурилиш» қўмитасининг Давлат архитектура-қурилиш назорати хулосасига мувофиқ яроқсиз деб топилган давлат кўчмас мулк объектларини бузиш тўғрисидаги қарорни қабул қилиш ҳуқуқига эга шахслар доираси кенгайтирилган.

Хусусан, бундай қарор Давлат активларини бошқариш агентлиги ҳузуридаги бўш турган объектлардан самарали фойдаланишни ташкил этиш маркази томонидан ҳам қабул қилиниши белгиланган. Иккинчидан, Президентнинг 2019 йил 5 февралдаги фармонининг 3-бандидан истеъмол этил спирти ишлаб чиқариш давлат монополияси ўрнатилиши тўғрисидаги хатбошиси чиқариб ташланган.

Учинчидан, Президентнинг 2018 йил 24 ноябрдаги фармонининг 6-бандига ўзгартириш киритиш билан инвестиция ва бошқарув компанияларининг фаолият юритиш тартиби ҳамда муайян имтиёзлар бериш тартибини белгилаган бандларнинг амал қилиш муддати 2024 йил 1 январгача узайтирилган. Илгари бу муддат 2022 йил 1 январгача белгиланган эди.

Тўртинчидан, меҳнат шартномаси асосида ишлаётган ходимларининг камида 30 фоизини умумий ўрта, ўрта махсус ва профессионал таълим муассасалари битирувчилари ташкил этган тадбиркорлик субъектларининг харидор томонидан инвестицион ва ижтимоий мажбуриятларни қабул қилиш шарти билан давлат мулки объектларини «ноль» харид қийматида сотиш бўйича ўтказиладиган танлов савдолари натижаларига кўра контрактни тузиш бўйича устуворлик ҳуқуқи бекор қилинган.

Қайд этилишича, ушбу ўзгартиришлар Президентнинг 2010 йил 28 июлдаги фармонига киритилган. Шунингдек, бошқа ўзгартириш ва қўшимчалар ҳам киритилган. Ҳужжат қонун ҳужжатлари маълумотлари миллий базасида эълон қилинган ва 2021 йил 27 декабрдан кучга кирган.

Аввалроқ Ўзбекистонда 14 та фаолият тури бўйича монополияларни тугатиш режалаштирилгани хабар қилинганди. Шунингдек, Ўзбекистонда монополияларнинг мутлақ ҳуқуқлари босқичма-босқич бекор қилиниши мумкинлиги ҳақида хабар берилди.