Хитой Интернетни бошқаришнинг кенг қамровли тизимини яратишни жадаллаштириш ва «кучли миллий киберхавфсизлик тўсиғи»ни қуриш ниятида. Бу ҳақда Reuters агентлиги Хитой кибермакон бошқармаси баёнотига таяниб хабар бермоқда.

Регуляторнинг таъкидлашича, Хитой ахборот соҳасидаги асосий технологиялар учун курашда ғалаба қозониши, шунингдек, онлайн муҳитда жамоатчиликнинг идрокини «кенгайтириши ва кучайтириши» керак.

Financial Times аввалроқ Хитой ижтимоий медиа цензурасини кучайтиргани ва Коммунистик партия позициясига зид бўлган турмуш тарзи ҳамда қадриятларини тарғиб қилувчи контентга қарши курашаётгани ҳақида хабар берган эди. Нашрнинг ёзишича, Хитой раиси Си Цзиньпин «умумий фаровонлик» сиёсати ҳақида гапира бошлаганидан кейин интернет устидан назорат кучайган.

FT’нинг ёзишича, Хитойда тобора кўпроқ ижтимоий медиа майдони фойдали ва таълим мазмунига эга бўлмоқда ҳамда Кибермакон бошқармаси 2020 йилнинг ўзида номақбул контентни тарқатганлик учун 20 минг нафар блогер аккаунтларини блоклаб қўйди.

«Пекин ижтимоий медиада давлат ҳақида яхши нарсалар айтиладиган ижобий постларни кўришни истайди ва томошабинлардан ҳам шундай илтимослар келган», — деди аноним қолишни сўраган хитойлик интернет тадқиқотчиси.

Ўтган август ойида Хитойнинг Economic Information Daily давлат нашри онлайн ўйинларни «маънавий афюн» деб танқид қилган эди. Хитойнинг энг йирик ўйин ишлаб чиқувчилари акциялари шундан сўнг арзонлашди.