Ўзбекистонда атом энергиясидан фойдаланиш соҳаси ходимлари мунтазам аттестациядан ўтказилади. Бу ҳақда Norma хабар берди.

Маълум қилинишича, Вазирлар Маҳкамасининг 10 январдаги қарори билан Атом энергиясидан фойдаланиш соҳасида фаолият олиб борадиган эксплуатация қилувчи ташкилотлар ва бошқа юридик шахслар ходимларини тайёрлаш, қайта тайёрлаш, уларнинг малакасини ошириш ҳамда уларни аттестациядан ўтказиш тартиби тўғрисидаги низом тасдиқланган.

Низом қуйидагиларни назарда тутади:

• эксплуатация қилувчи ташкилотлар ва бошқа юридик шахслар ходимларини тайёрлаш, қайта тайёрлаш, уларнинг малакасини ошириш муддатлари, тартиби ва уларни амалга оширувчи ташкилотлар;
• аттестациядан ўтказиш тартиби, муддатлари, аттестация турлари ҳамда аттестациядан ўтказиладиган ходимлар тоифалари;
• аттестация комиссиясининг таркибини шакллантириш ва фаолиятини ташкил этиш;
• аттестация натижалари бўйича апелляция бериш ва уни кўриб чиқиш қоидалари.

Қайд этилишича, Саноат хавфсизлиги давлат қўмитасига атом энергиясидан фойдаланиш соҳасида фаолият олиб борадиган эксплуатация қилувчи ташкилотлар ва бошқа юридик шахслар ходимларини аттестациядан ўтказиш ҳамда уларнинг малакасини ошириш тўғрисидаги маълумотлар базасининг марказлаштирилган тартибда шакллантирилишини ва юритилишини таъминлаш топширилган.

Бундан ташқари, ходимларни даврий аттестациядан ўтказиш тегишли муддатларда амалга оширилади. Жумладан, эксплуатация қилувчи ташкилотлар ва бошқа юридик шахсларнинг раҳбарлари, уларнинг аттестация комиссиялари раислари ва раис ўринбосарлари учун — беш йилда бир марта.

Шунингдек, эксплуатация қилувчи ташкилотлар ва бошқа юридик шахсларнинг ядровий ва радиациявий хавфсизликнинг идоравий (ишлаб чиқариш) назоратини, атом энергиясидан фойдаланиш соҳасида технологик жараённи амалга оширувчи, ядровий материаллар ва радиоактив моддаларни ҳисобга олиш ва назорат қилиш, шунингдек, уларнинг жисмонан ҳимоя қилинишини таъминловчи, ядровий материаллар, радиоактив моддалар ёки улар асосидаги маҳсулотларни ташувчи ходимлар, шунингдек, аттестация комиссиялари аъзолари учун — уч йилда бир марта.

Шу билан бирга, муҳандис- техник ва бошқа ишчи ходимлари — бир йилда бир марта даврий аттестацияси ўтказилади.

Ҳужжат қонун ҳужжатлари маълумотлари миллий базасида эълон қилинган ва 11 апрелдан кучга киради.

Аввалроқ Қозоғистон Хитойдан келаётган криптомайнерлар туфайли АЭС қуриши мумкинлиги хабар қилинганди.