Қозоғистон Хитойдан келаётган криптомайнерлар туфайли АЭС қуриши мумкин
Улкен қишлоғида атом электр станцияси қурилиши мумкин.
Қозоғистон хитойлик криптовалюта майнингчиларининг оммавий миграцияси фонида атом электр станцияси қуришни режалаштирмоқда, деб ёзади «Ведемости».
Бу ҳақда мамлакат энергетика вазири Мағзум Мирзагалиев маълум қилган.
«Аҳолимиз ва иқтисодиётимизни электр энергияси билан таъминлаш учун атом электр станциясини қуриш зарурлигини яққол кўриб турибмиз» , — деди Мирзагалиев.
Қозоғистон декарбонизацияга интилмоқда, аммо ҳозиргача электр станцияларининг 70 фоизи кўмирда ишлайди. Вазирнинг сўзларига кўра, атом электр станцияси мамлакатнинг электр энергиясига бўлган эҳтиёжини қоплай олади, бироқ унинг қурилиши 10 йилгача давом этади.
Мирзагалиевнинг айтишича, Улкен қишлоғида атом электр станцияси қурилиши мумкин, чунки у ердан «Шимол-Жануб» электр узатиш линияси ўтади. Аҳоли пункти асосий энергия истеъмолчилари ёнида жойлашган.
Financial Times газетасининг 2021 йил ноябрь ойи учун маълумотларига кўра, Хитойдан Қозоғистонга деярли 88 мингта майнинг қурилмалари жўнатилган.
Қозоғистон криптовалюталарни қазиб олиш бўйича мамлакатлар рейтингида иккинчи ўринни эгаллади (биринчи ўринда АҚШ).
Аввалроқ Хитойдан криптомайнерларнинг кўчиши туфайли Қозоғистонда энергия истеъмоли кескин ўсгани, маҳаллий электр станциялари юкланишларни кўтаришдан тўхтагани ҳақида хабар берилганди.
