Хитойнинг Evergrande кўчмас мулк гиганти ўзининг биринчи электромобили Hengchi 5’ни конвейердан чиқарди. Бу ҳақда Business Insider Weibo компаниясининг микроблогига таяниб хабар бермоқда.

Маълум қилинишича, электромобиль ишлаб чиқариш белгиланган муддатдан 12 кун олдин якунланган. Бу Evergrande New Energy Vehicle Group учун муҳим босқичдир.

«Агар Hengchi 5 автомобиллари яхши сотилса, бу бизнесни сақлаб қолиш учун бир неча ойлик саъй-ҳаракатлардан кейин Evergrande учун умид чироғи бўлади. Бу Evergrande томонидан молиялаштириш инқирозини енгиш учун қилинган муҳим қадам эди», — дейди Suolei консалтинг компаниясининг катта менежери Эрик Хань.

Evergrande электромобилларнинг бир нечта моделларини тақдим этган, бироқ ҳозирча фақат Hengchi 5 серияли ишлаб чиқаришга кирган. Унинг масофа захираси бир қувватланишда тахминан 700 километрга етади. Электромобилнинг нархи 31,4 минг долларни ташкил этади.

Қайд этилишича, Хитой электр транспорт воситалари учун дунёдаги энг йирик бозор ҳисобланади. Бу борада Evergrande Tesla билан, шунингдек, BYD, Nio, Xpeng ва Li Auto каби кўплаб етакчи маҳаллий брендлар билан рақобатлашишига тўғри келади.

Хабарга кўра, 2021 йилнинг октябрь ойида Evergrande ўзининг биринчи автомобилларини 2022 йилда чиқаришини айтганди. Ушбу янгиликлар фонида ишлаб чиқувчининг бир қисми бўлган China Evergrande New Energy Vehicle Group акциялари 10 фоиздан кўпроққа кўтарилган, бироқ кейинчалик 6 фоизга тушган.

Evergrande компаниясининг электр автомобиллари бўйича амбициялари 300 миллиард долларлик қарзни енгиш борасидаги саъй-ҳаракатлар фонида пайдо бўлган. Хитой ҳукумати аллақачон компанияни қайта қуриш жараёнига аралашган.

Аввалроқ Evergrande асосчиси компания қарзларини тўлаш учун 1,1 миллиард долларлик активларини сотгани хабар қилинганди.