Porsche Cayenne кроссоверининг янги версиясини тақдим этди (фото)
Янги платина версияни Cayenne, Cayenne E-Hybrid ва Cayenne S кроссоверларида қўллаш мумкин.
Porsche компанияси Cayenne кроссоверининг янги модификацияси – Platinum Edition’ни намойиш қилди. Бу ҳақда «Коммерсантъ» хабар берди.
Маълумотларга кўра, автомобиль платина рангидаги кузов безаклари, ўчирилган орқа чироқлар, қора рангли тутун чиқариш қувурлари ва 21 дюймли RS Spyder Design ғилдиракларини ўзида мужассам этган.
Салонда алюминий эшик токчалари, олд панельдаги аналог соат, спорт рули, Bose акустикаси ва бошқа жиҳозлар мавжуд.
Техник жиҳатдан Platinum Edition стандарт Porsche Cayenne’дан фарқ қилмайди ва фақат махсус ташқи ва ички декорацияга, шунингдек кенгайтирилган асосий комплектацияга эга. Янги версия Cayenne, Cayenne E-Hybrid ва Cayenne S кроссоверлари, шунингдек, уларнинг купе модификациялари учун татбиқ қилинади.
Аввалроқ Porsche Taycan’нинг кучайтирилган версияси тақдим этилгани хабар қилинганди. Шунингдек, Porsche компанияси Vision Gran Turismo виртуал суперкарини тақдим этгани ҳақида хабар берилди.
