Буюк Британияда йиллик инфляция 2021 йил декабрь ойида 5,4 фоизгача тезлашди, бу таҳлилчилар кутганидан ошиб кетди ва 1992 йилдан бери энг юқори кўрсаткичга айланди. Бу ҳақда Буюк Британия Миллий статистика бошқармаси маълум қилди.

Қайд этилишича, энг кўп озиқ-овқат, мебель, кийим-кечак, меҳмонхонада тунаш ва ресторанларда овқатланиш нархлари кўтарилган. Шундай қилиб, озиқ-овқат нархлари йилига 4,2 фоизга ошган, бу сўнгги 8 йил ичида кузатилган энг юқори ўсишдир.

Тахминан озиқ-овқат нархларига ўхшаш динамика кийим-кечак ва пойабзалда ҳам кузатилган. Аксарият таҳлилчилар декабрь ойида инфляциянинг йиллик ўсиш суръати 5,2 фоиздан ошмаслигини кутганди. Бироқ якунда у 5,4 фоизга етди.

Шу билан бирга, йил бошидан бери фойдаланилган автомобиллар 28 фоизга қимматлашган. Буларнинг барчаси табиий газ нархининг бир неча баробар ошиши ортидан электр энергияси нархининг кескин кўтарилиши фонида содир бўлмоқда.

Хабарга кўра, Буюк Британияда нархлар чегараси апрель ойида яна кўтарилиши кутилмоқда ва уй электр энергияси учун ўртача тўлов йилига 50 фоиз ёки 700 фунт стерлингга ошиши мумкин.

Аввалроқ АҚШда инфляция рекорд даража — 7 фоизга етгани хабар қилинганди. Шунингдек, Францияда инфляция 13 йил ичидаги максимал даражада сақланиб қолгани ҳақида хабар берилганди.