Apple iPhone’га банк карталари билан контактсиз тўловларни қабул қилиш функциясини қўшишни режалаштирмоқда. Бу ҳақда Bloomberg хабар берди.

Маълум қилинишича, Apple iPhone смартфонларига банк карталари орқали тўловларни қабул қилиш имкониятини қўшишни режалаштирмоқда. Бунда тўловни амалга ошириш учун банк картасини ёки контактсиз тўловни қўллаб-қувватлайдиган бошқа смартфонни iPhone’га олиб келиш кифоя қилади.

Маълумотларга кўра, функция ишлаши учун қўшимча қурилмалар ва компонентлар талаб қилинмайди. Apple яқин ойларда дастурий таъминотни янгилаш билан тўловларни қабул қилиш имкониятини ишга тушириши мумкин. Apple яқин орада iOS 15.4 янгиланишининг биринчи бета-версиясини чиқариши кутилмоқда ва у баҳорда кенг оммага тақдим этилади.

Apple анъанавий тарзда iOS’нинг янги версияларини июнь ойида ишлаб чиқувчилар конференциясида эълон қилади ва улар кузда фойдаланувчиларга тақдим этилади.

Apple матбуот котиби изоҳ беришдан бош тортган. Қайси iPhone моделлари тўловларни қабул қилишни қўллаб-қувватлайдиган янгиланишни олиши мумкинлиги кўрсатилмаган. Тахмин қилинишича, ҳозирда iPhone’да Apple Pay учун ишлатиладиган NFC — смартфон учун контактсиз тўлов тизимидан фойдаланилади.

Apple мавжуд тўлов тармоқларидан бири билан ҳамкорлик қилиш ниятидами ёки уни ўзи яратадими, ҳозирча номаълум. Янги опция Apple Pay’нинг бир қисми бўладими ёки йўқми — аниқ эмас, бироқ унинг ортида турган жамоа аввалроқ компаниянинг тўловлар бўлимида ишлаган. Apple бу функцияни тахминан 2020 йилдан бошлаб, худди шундай технологияни ишлаб чиқаётган Канаданинг Mobeewave стартапини сотиб олганидан бери ишлаб чиқмоқда. Ўшанда битим тахминан 100 миллион долларни ташкил этган.

Смартфонга сим ёки Bluetooth орқали уланадиган қўшимча терминаллар мавжуд бўлса, смартфонлар контактсиз тўловларни қабул қилиши мумкин. Бу борада бозорда Twitter асосчиси ва собиқ бош директори Жек Дорси асос солган Square компанияси ҳукмронлик қилмоқда. Бироқ, Samsung 2019 йили смартфонларда тўловларни қабул қилишни эълон қилган — худди шу Mobeewave билан ҳамкорликда — ва бизнес учун махсус технологик ёрдамга эга қурилмаларни чиқарган.

Аввалроқ Apple дунёдаги энг қиммат бренд деб топилгани хабар қилинганди. Шунингдек, Apple баҳорда iPhone’нинг янги моделини тақдим этиши ҳақида хабар берилди.