28 январь куни Президент Шавкат Мирзиёев раислигида мактаб таълимини ривожлантириш масалалари юзасидан видеоселектор йиғилиши бўлиб ўтди. Бу ҳақда Президент матбуот хизмати хабар берди.

Қайд этилишича, йиғилишда Президент мактаб таълими ислоҳотининг асосий йўналишларини белгилаб берган.

Келгуси беш йилда 1,2 миллион ўқувчи ўрни яратилиши лозимлиги таъкидланган. Ушбу мақсадлар учун 2021 йилнинг ўзида 527 та мактабни қуриш ва реконструкция қилишга 2,5 триллион сўм ажратилади. Бу маблағ янада кўпайтирилади.

«Бир нарсани аниқ тушуниш керак. Янги қурилаётган ва таъмирланаётган мактаблар ҳам ўқувчилар, ҳам педагоглар учун қулай ва мослашувчан бўлиши керак. Янги қурилаётган мактабларда қуёш панели ва иссиқ сув коллектори албатта бўлиши шарт», — дейди Шавкат Мирзиёев.

Давлат раҳбарининг сўзларига кўра, бу ишлар билан энди жойларда вилоят, шаҳар ва туман ҳокимлари шуғулланади. Бугундан бошлаб Халқ таълим вазирлигининг қурилишга буюртмачи бўлиш ваколати тугатилади.

Шунингдек, мутасаддилар ва вилоят ҳокимларига бир ой муддатда янги талаблардан келиб чиқиб, «намунавий мактаб» лойиҳаларини тақдимот қилиш топширилган.

«Энди янги мактаблар маҳалла фаоллари, ота-оналар ва жамоатчилик назорати остида қурилади ва фойдаланишга қабул қилинади», — дейди Президент.

Юқори малакали, изланувчан, ўзининг «маҳорат мактаби»га эга муаллимларни рағбатлантириш бўйича қўшимча чоралар белгиланган. Унга кўра, Халқ таълими вазирининг жамғармаси ташкил этилади.

Жамғармага дастлаб бюджетдан 300 миллиард сўм ажратилади. Ушбу маблағлар илғор педагогик технологияларни жорий этаётган, ўқувчилари юқори натижаларга эришган муаллимларга ҳам берилади.